Sürücünün siqaret çəkdiyini xəbər ver, BNA-dan mükafat al - VİDEO
14:51 14 Fevral 2019
Bakı Nəqliyyat Agentliyi (BNA) “Tütün məmulatlarının istifadəsinin məhdudlaşdırılması haqqında” Qanundan irəli gələn bəzi məsələlərin icrası ilə bağlı layihəyə başlayıb.
BNA-nın mətbuat xidmətinin rəhbəri Mais Ağayevin Femida.az-a verdiyi məlumata görə, layihəyə əsasən, Bakı şəhərinin inzibati ərazisində müntəzəm marşrut xətti üzrə sərnişin avtobuslarından istifadə edən sərnişinlər sükan arxasında tütün məmulatından istifadə edən sürücünün inzibati qaydada məsuliyyətə cəlb edilməsində iştirak edə bilər:
“Bunun üçün sürücünün xəta törətməsini aydın əks etdirən foto çəkilməli, avtobusun eyniləşdirmə və ya dövlət qeydiyyat nömrəsi, marşrut xəttinin nömrəsi barədə məlumatları Agentliyin facebook sosial şəbəkəsindəki rəsmi səhifəsinə və ya “Tütün” başlığı ilə [email protected] elektron ünvanına göndərilməlidir. Məlumatlar xətanın aşkar edildiyi andan 24 saat müddətinədək təqdim edilməlidir. Xətanı törədən sürücünün İnzibati Xətalar Məcəlləsinə uyğun olaraq məsuliyyətə cəlb edilərək 40 manatdan 50 manatadək məbləğdə cərimələnməsi həyata keçiriləcək”.
M.Ağayev bildirib ki, Bakı Nəqliyyat Agentliyi ictimai nəqliyyatda etik davranış qaydalarına əməl edilməsi sahəsində birgə mübarizənin əhəmiyyətli olduğunu bildirir və sərnişinləri aktiv olmağa dəvət edir:
“Rüblük olaraq daha çox inzibati xəta göndərən (məlumatları rəsmiləşdirilən) sərnişin mükafatlandırılacaq”.
Femida.az
Oxunub: 871
