Pulu saymağa 4 işçi ayrılıbmış... - Məhkəmədə 5,5 milyardlıq iş

Pulu saymağa 4 işçi ayrılıbmış... - Məhkəmədə 5,5 milyardlıq iş


18:10     20 Fevral 2019 19_02_20_1550664004.jpg

Bakı Ağır Cinayətlər Məhkəməsində cinayət yolu ilə əldə edilmiş 5,5 milyard manat pulu leqallaşdırmaqda təqsirləndirilən Malik Əliyev və Rüfət Vəliyevin məhkəməsi keçirilib.


“Qafqazinfo”nun verdiyi xəbərə görə, hakim Azad Məcidovun icraatında olan prosesdə şahidlər dindirilib.

"Röyalbank"ın keçmiş əməkdaşı Vidadi Əliyev deyib ki, 2013-ci ildə M.Əliyevlə tanış olub: “Malik mənə iş təklif etdi, razılaşdım. Sonra məni Rüfət müəllimlə tanış etdi. Bizə “AGbank”ın Xətai filialının 2-ci mərtbəsində ayrıca otaq ayrıldı. Bankda qeyri-rəsmi olaraq kassir kimi işlədim. Pulları Rüfət müəllim gətirirdi, otaqda bankın rəsmi işçiləri Kamil, Nurlana və Ramirə ilə sayırdıq. Otağın açarı məndə olurdu, sənədləşmə işlərinə mən baxmamışam. Amma pulların əsil sahibinin kim olduğunu bilmirəm. Kassir kimi Rüfət Vəliyevdən nağd formada 800 manat maaş alırdım".

Proses fevralın 27-də davam etdiriləcək.

İttihama görə, M.Əliyev “Privion Group” MMC vasitəsilə 2014-cü ilin fevral ayından 2015-ci ilin oktyabr ayına kimi 839 milyon manat, “İmpeks+” MMC vasitəsilə 2013-cü ilin noyabr ayından 2015-ci ilin oktyabr ayına kimi 778 milyon manat, “Blast” MMC vasitəsilə həmin müddət ərzində 510 milyon manat, “Qalaksi A” MMC vasitəsilə 115 milyon manat, “Asin Co. LTD” vasitəsilə 79 milyon manat, “Primo A” MMC vasitəsilə 213,5 milyon manat, “İTEK” MMC vasitəsilə 129 milyon manat pulu müxtəlif xarici valyutalara konversiya edərək xarici ölkələrdə yaradılan şirkətlərin bank hesablarına köçürüb. Digər təqsirləndirilən Rüfət Vəliyev də oxşar əməllərlə cinayət yolu ilə əldə edilmiş 3 milyard manat pulu leqallaşdırıb.

Açar sözlər:

Oxunub: 208