Azərbaycan ərəb ölkələrinə qazsız ixrac edəcək


10:44     21 Fevral 2019 2019/02/su-icmek_1550732898.jpg

“Made in Azerbaijan” brendinin təşviqi, istehsalın və ixracın stimullaşdırılması məqsədi ilə Azərbaycan məhsulları Birləşmiş Ərəb Əmirliklərinin (BƏƏ) Dubay şəhərində keçirilən “Gulfood 2019” beynəlxalq qida sərgisində nümayiş olunur.



Femida.az bu barədə İqtisadiyyat Nazirliyinə istinadən xəbər verir.

Məlumata görə, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə qida sənayesi sahəsində fəaliyyət göstərən 21 Azərbaycan şirkəti öz məhsullarını vahid ölkə stendində təqdim edir. Artıq sərgi çərçivəsində Azərbaycanda istehsal olunan məhsulların ixracına dair razılıqlar əldə olunub.

Belə ki, “Babək Sirab” şirkəti Səudiyyə Ərəbistanı, “Gədəbəy Mineral Suları” şirkəti isə Oman, BƏƏ və Hindistandan olan şirkətlərlə qazsız suların ixracına dair ilkin razılığa gəliblər. “Eco Dry” şirkətinin Oman və BƏƏ şirkətləri ilə meyvə qurularının ixracına dair apardığı danışıqlar da razılıqla nəticələnib.

“Delta” şirkəti bir sıra Afrika ölkələrinə məhsulların satışına dair distribütor şirkətlə razılıq əldə edib.

Bundan başqa, “Crispa snacks” şirkəti Hindistan, İraq və BƏƏ şirkətləri, ”Aznar” və “Azersun” şirkətləri isə BƏƏ və Hindistan şirkətləri ilə, “APİAZ” şirkəti BƏƏ və Küveytdən olan sahibkarlarla, ”Balxurma” şirkəti isə Argentina, Səudiyyə Ərəbistanı, BƏƏ və Hindistandan olan şirkətlərlə ixraca dair müzakirələr aparıb.

Səudiyyə Ərəbistanı, BƏƏ, Bəhreyn və İraqdan olan şirkətlərin “Şirin” şirkətinin məhsullarina marağı böyük olub. “Atena” şirkəti məhsullarının Liviyaya, “Tac” və “Ayan” şirkətləri BƏƏ şirkəti ilə nar limonadının ixracına dair danışıqlar aparıb.

“CanPa” şirkəti BƏƏ-dən olan şirkətlə məhsulların satışına dair razılıq əldə edib, yaxın günlərdə qənnadı məhsullarının ixracına başlanılacaq.

“Gulfood 2019” beynəlxalq qida sərgisi bu gün başa çatacaq.


Femida.az

Açar sözlər:

Oxunub: 452