Səbrimizin də bir həddi var - Prezident Administrasiyasının şöbə müdiri

"Səbrimizin də bir həddi var" - Prezident Administrasiyasının şöbə müdiri


17:33     18 Mart 2019 19_03_18_1552916135.jpg


Azərbaycan 25 ildən çoxdur ki, Dağlıq Qarabağ məsələsinin sülh yolu ilə həllinin tərəfdarıdır.


Femida.az oxu.az-a istinadən xəbər verir ki, bu fikirləri "Anadolu" agentliyinə müsahibəsində Azərbaycan Prezident Administrasiyasının xarici siyasət məsələləri şöbəsinin müdiri Hikmət Hacıyev deyib.

Onun sözlərinə görə, Azərbaycanın da səbrinin həddi var və Ermənistan ordusu BMT-nin qətnamələrinə uyğun olaraq işğal etdikləri Azərbaycan torpaqlarından çıxmalıdır, əks halda Azərbaycan BMT-nin nizamnaməsində göstərilən bütün hüquqlarından istifadə etməli olacaq.

H.Hacıyev bildirib ki, Ermənistan rəhbərliyi Sarqsyan-Koçaryan rejiminin səhvlərini davam etdirir və danışıqlar prosesini bloklayacaq bəyanatlar səsləndirirlər.

O əlavə edib ki, beynəlxalq ictimaiyyət Ermənistana dəqiq siyasi və diplomatik mesajlar çatdırmalıdır:

"Beynəlxalq ictimaiyyətin Dağlıq Qarabağ məsələsinin həlli üçün göstərdiyi səylər yetərsizdir".

"Danışıqlar prosesi 25 ildir davam edir. Bu müddətdə Azərbaycan torpaqları işğaldan azad edildimi? Xeyr. Qaçqınlar torpaqlarına geri qayıtdımı? Xeyr. Artıq işğalçı və hücumçuları öz adları ilə çağırmanın vaxtıdır", - PA rəsmisi bildirib.

O qeyd edib ki, Ermənistan işğal altında saxladığı Azərbaycan torpaqlarındakı qızıl və mis mədənlərindən istifadə edərək, dünya bazarına satır və bu, bütün beynəlxalq sazişlərə ziddir.

H.Hacıyev işğal altındakı torpaqlarda Azərbaycana aid dini və mədəni abidələrin məhv edildiyini, bunun sadəcə Azərbaycana deyil, dünya mədəniyyətinə vurulan zərbə olduğunu deyib.

PA rəsmisi AƏT-in Minsk qrupunun həmsədrlərinin xalqların sülhə hazır olmasının vacibliyi ilə bağlı bəyanatına da diqqət çəkib.

"Əminliklə deyə bilərəm ki, Azərbaycan xalqı sülhə hazırdır. Davamlı olması üçün sülh ədalətli olmalıdır. Ermənistan ordusu işğal altındakı bölgələrdən çıxmalı, qaçqınlar öz torpaqlarına geri qayıtmalıdır. Yalnız bu vəziyyətdə sülh əldə edilə bilər. Ermənistan hazırda apardığı xarici siyasət bütün region üçün ciddi təhlükədir", - o əlavə edib.

H.Hacıyev Türkiyə-Azərbaycan arasındakı əməkdaşlığın ən yünsək zirvədə olduğunu da diqqətə çatdırıb.

Femida.az

Açar sözlər: siyasət  

Oxunub: 172