Hüseyn Abdullayevin məhkəməsində zərərçəkmişlər ifadə verib

Hüseyn Abdullayevin məhkəməsində zərərçəkmişlər ifadə verib


16:35     16 Aprel 2019 19_04_16_1555418174.jpg

Bu gün Bakı Hərbi Məhkəməsində sabiq deputat Hüseyn Abdullayev, onun anası Zeynəb Abdullayeva, Həbib İbrahimov, Xalid Əliyev, Namiq Babayev, İntiqam Süleymanov, Pərviz Kazımov, Zaur Quliyev və Nazim Əliyevin cinayət işi üzrə məhkəmə prosesi davam etdirilib.


Femida.az xəbər verir ki, hakim Həbib Həsənovun sədrliyi ilə keçirilən prosesdə zərərçəkmişlər ifadə verib.

Bakı Autizm İdman və Yaşam Klubunun direktoru Elnur Məmmədov H.Abdullayev tərəfindən hədə-qorxuya məruz qaldığını deyib: "Hüseyn Abdullayevə məxsus obyekti kirayə götürmüşdüm. Elə oldu ki, icarə haqqı bir müddət gecikdi. Bundan sonra Hüseyn mənə Almaniyadan zəng edib, hədə-qorxu gəldi. Dedi ki, icarə haqqını ödəməsən, başına oyun açacağam. Mən də bərk qorxdum. Bu baxımdan özümü zərərçəkmiş hesab edirəm. İcarə haqqını isə sonradan ödədim".

Digər zərərçəkən, Nəqliyyat, Rabitə və Yüksək Texnologiyalar Nazirliyində maliyyəçi vəzifəsində işləmiş Rəcəb Rəcəbov isə H.Abdullayevdən şikayətçi olmadığını deyib.

Prosesdə H.Abdullayev zərərçəkmişə sual vermək istəyib. Hakim isə onun ifadə vermədiyini əsas gətirərək, sözünü kəsib.

Proses aprelin 18-də davam etdiriləcək.

Qeyd edək ki, cinayət işi üzrə Hüseyn Abdullayev və anası Zeynəb Abdullayevadan başqa Həbib İbrahimov, Xalid Əliyev, Namiq Babayev, İntiqam Süleymanov, Pərviz Kazımov, Zaur Quliyev və Nazim Əliyev də təqsirləndirilən şəxs qismində tanınıb. Onlar Cinayət Məcəlləsinin 178.3.1-ci (dələduzluq), 182.3.1-ci (hədə-qorxu ilə tələb etmə), 192.2.2; 192.2.3; 193-1.3.2 və 193-1.3.1-ci (qanunsuz sahibkarlıq), 213.2.2 və 213.2.1-ci (vergidən yayınma) 228.1-ci (qanunsuz silah saxlama), 312-1.2-ci (rüşvət vermə) 313-cü (vəzifə saxtakarlığı), 308.2-ci (vəzifə səlahiyyətlərindən sui-istifadə etmə), 326.1-ci (rəsmi sənədləri məhv etmə), 318.2-ci (qanunsuz sərhədi keçmə), 342.2-ci (qulluğa səhlənkarlıqla yanaşma); 341.2.3-cü (Hakimiyyətdən sui-istifadə etmə, hakimiyyət həddini aşma və ya hakimiyyətdən istifadə etməmə), 339.2-ci (Sərhəd xidməti qaydalarını pozma) maddələri ittiham olunur.

Xatırladaq ki, təqsirləndirilən H.Abdullayev Türkiyə Respublikası ərazisində tutularaq, 22 aprel 2018-ci il tarixdə Azərbaycan Respublikasının hüquq-mühafizə orqanlarına təhvil verilib.

Açar sözlər:

Oxunub: 191