Vəzifəli şəxs təbiətə ziyan vuran bələdiyyəni məhkəməyə verdi

20:22 06 May 2019

Şəki İnzibati-İqtisadi Məhkəməsində 7 saylı Regional Ekologiya və Təbii Sərvətlər İdarəsinin rəisi vəzifəsini müvəqqəti icra edən Yusifov Namiq Polad oğlunun cavabdeh Zaqatala bələdiyyəsinə qarşı təbiətə vurulmuş 3710 manat məbləğində ziyanın Ərtaf Mühitin Mühafizəsi üzrə Dövlət Fonduna ödənilməsi tələbinə dair iddia ərizəsinə baxılıb.

ONA-nın xəbərinə görə, hakim Rüfət Məcidovun sədrliyi ilə keçirilən prosesdə qərar elan edilib.

Qərara əsasən, iddia ərizəsi geri qaytarılıb.

Bildirilib ki, Mülki Prosessual Məcəlləsinə əsasən, iqtisadi mübahisələr üzrə məhkəmə icraatı, o cümlədən ərizə, şikayət və digər sənədlərin göndərilməsi, qəbulu, habelə məhkəmə sənədlərinin məhkəməyə və proses iştirakçılarına çatdırılması "Elektron məhkəmə" informasiya sistemində yaradılan elektron kabinet vasitəsilə həyata keçirilir. İddiaçı isə hazırkı iddia ərizəsini "Elektron məhkəmə" informasiya sistemində yaradılan elektron kabinet vasitəsilə deyil, kağız daşıyıcıda məhkəməyə təqdim etmiş və gücləndirilmiş elektron imzadan və sertifikatlaşdırılmış elektron imza vasitələrindən istifadə etməyib. Bu səbəbdən məhkəmə hesab edir ki, iqtisadi mübahisələr üzrə məhkəmə icraatı "Elektron məhkəmə" informasiya sistemində yaradılan elektron kabinet vasitəsilə həyata keçirilməli olduğundan və bununla da iddia ərizəsi forma və məzmununa dair tələblərə riayət edilmədən bu Məcəllənin tələblərinə riayət edilməklə verilmədiyindən iddianın hazırkı vəziyyətdə məhkəmə icraatı mümkün deyil.

Açar sözlər:

Oxunub: 394