Bakıda əcnəbi vətəndaşın məhkəməsi başlayır


18:16     16 Oktyabr 2019 1398947325_mehkeme.jpg

Bakıda ölümlə nəticələnən yol-nəqliyyat hadisəsi törətməkdə təqsirləndirilən Səudiyyə Ərəbistanı vətəndaşı Ezzat Ahmed Khalid Ezzatın cinayət işi üzrə ibtidai istintaq başa çatıb.

Femida.az -ın xəbərinə görə, cinayət işi baxılması üçün Bakı Ağır Cinayətlər Məhkəməsinə göndərilib.

Hakim Novruz Kərimovun icraatında olan iş üzrə hazırlıq iclası yaxın günlərdə keçiriləcək.

Qeyd edək ki, hadisə bu ilin iyun ayında Bakının Nəsimi rayonunda, Vaqif küçəsi, 5 ünvanında baş verib.

Səudiyyə Ərəbistanından olan turist kirayə götürdüyü 90-AU-667 dövlət qeydiyyatı nişanlı, KİA markalı minik maşını ilə yolu keçən 2013-cü il təvəllüdlü Səlimov Səlim Arif oğlunu vurub.

1 saylı Klinik Tibbi Mərkəzə aparılan yaralıya ağır kəllə-beyin travması diaqnozu qoyulub və Reanimasiya şöbəsinə yerləşdirilib. Sonradan azyaşlı dünyasını dəyişib.

Ezzat Ahmed Khalid Ezzata Cinayət Məcəlləsinin 263-1.3 (yol hərəkəti və ya nəqliyyat vasitələrinin istismarı qaydalarını sərxoş halda və ya nəqliyyat vasitələrini idarə etmək hüququ olmayan şəxs tərəfindən pozma ehtiyatsızlıqdan zərərçəkmiş şəxsin ölümünə səbəb olduqda) maddəsi ilə ittiham elan edilib.

Açar sözlər:

Oxunub: 479