Azərbaycanda futbolçunun qətl törədən atasına hökm oxundu

17:04     29 Oktyabr 2019

Bakı Ağır Cinayətlər Məhkəməsində qətl törətməkdə ittiham olunan 61 yaşlı Zahid Novruzovun cinayət işi üzrə məhkəmə istintaqı yekunlaşıb.

Femida.az-ın virtualaz.org-a istinadən xəbərinə görə, prosesdə hökm oxunub. Hökmə əsasən Z.Novruzov 17 il müddətinə azadlıqdan məhrum edilib.

Qeyd edək ki, hadisə bu il iyunun 1-də Suraxanı rayonunun Hövsan qəsəbəsi, İlqar Əhliman küçəsi, 10 ünvanında baş verib. Həmin binanın arxasında Təranə Novruzova əri tərəfindən ov tüfəngi ilə güllələnərək qətlə yetirilib. Əvvəllər məhkumluq həyatı yaşamış Laçından olan məcburi köçkün Zahid Novruzov arvadını namus üstündə öldürdüyünü bildirib. O, həyat yoldaşına iki güllə vurduqdan sonra özünü də öldürmək istəyib. Lakin silah əlindən sürüşüb və nəticədə o, boğaz nahiyəsindən yaralanıb. Yaralı şəkildə 1 saylı Şəhər Kliniki Xəstəxanasına çatdırılıb, həyatını xilas etmək mümkün olub. Faktla əlaqədar Suraxanı Rayon Prokurorluğunda cinayət işi başlanılıb. Zahid Novruzova qarşı Cinayət Məcəlləsinin 120.2.4-cü (xüsusi amansızlıqla qəsdən adam öldürmə) maddəsi ilə ittiham irəli sürülüb. Z.Novruzov ona elan olunmuş ittihamla özünü təqsirli bilməyib. O, hadisənin ehtiyatsızlıqdan baş verdiyini, arvadını öldürmək niyyəti olmadığını deyib: “Həyat yoldaşım namuslu, dindar qadın idi. İistintaqda ondan şübhələndiyimi, qısqanclığa görə öldürdüyümü deməmişəm. Müstəntiq bunları özü yazıb". Təqsirləndirilən şəxs arvadını vurduqdan sonra özünü güllələməsini belə izah edib: "Təranəni qanlar içində görəndə qorxdum. Buna görə də özümü öldürmək istədim".

Mərhumun oğlu Nurlan Novruzov “Səbail”, “Bakı”, “Zirə” kimi klublarının oyunçusu olub. O, Türkiyə klublarında da forma geyinib. N.Novruzov 2014-2015-ci il mövsümündə “Bakı”nın heyətində 15 qol vuraraq Azərbaycan çempionatında bombardiri olub. Hazırda isə Moldovanın “Dinamo-Avto” klubunda karyerasını davam etdirir.

Femida.az

Açar sözlər: #qətl  

Oxunub: 492