Vəkillər və hakimlər toplandı - Məhkəmə-hüquq islahatları müzakirə olundu

13:30 30 Noyabr 2019

Vəkillər Kollegiyası və Məhkəmə Hakimləri Assosiasiyaları İttifaqının birgə təşkilatçılığı ilə “Məhkəmə-hüquq sistemində islahatların dərinləşdirilməsi haqqında” Azərbaycan Respublikası Prezidentinin 03.04.2019-cu il tarixli Fərmanından irəli gələn tələblərin icrası ilə əlaqədar dəyirmi masa keçirilib.

Femida.az xəbər verir ki, 20-dən artıq hakim, 40-dan çox vəkil, Ədliyyə Nazirliyi, Baş Prokurorluq və Daxili İşlər Nazirliyinin təmsilçilərinin iştirakı ilə keçirilən dəyirmi masanın keçirilməsinin məqsədi hakimlər, vəkillər, cinayət təqibini həyata keçirən orqanların əməkdaşları arasında qarşılıqlı prosessual münasibətlərə işıq tutulması, bu sahədə qarşılaşıla bilən problemlərin təhlili təşkil edir.

Tədbiri giriş söz ilə açan Məhkəmə Hakimləri Assosiasiyaları İttifaqının sədri Ələddin Cəfərov ölkəmizdə məhkəmə-hüquq islahatları çərçivəsində aparılan mütərəqqi islahatlar, hazırda təcrübədə rastlaşılan vəkil-hakim münasibətlərinin etik tərəfləri barədə məlumat verib.

Daha sonra, Vəkillər Kollegiyasının sədri Anar Bağırov “Məhkəmə-hüquq sistemində islahatların dərinləşdirilməsi haqqında” Azərbaycan Respublikası Prezidentinin Fərmanın hakimlər, vəkillər, cinayət təqibini həyata keçirən orqanların əməkdaşları arasında münasibətlər baxımından əhəmiyyəti, vəkillərin aparılan məhkəmə-hüquq islahatlarında rolu, Vəkillər Kollegiyası ilə Məhkəmə Hakimləri Assosiasiyaları İttifaqı arasında əməkdaşlıq münasibətlərin zəruriliyi barədə çıxış edib. Bundan başqa, Anar Bağırov öz çıxışında vəkillər və hakimlər arasında bu formatda tədbirin ilk dəfə keçirildiyini xüsusi olaraq vurğulayıb.

Tədbir çərçivəsində Bakı Apellyasiya Məhkəməsinin hakimi İkram Şirinovun “Hakimlər, vəkillər, cinayət təqibini həyata keçirən orqanların əməkdaşları arasında münasibətlərin prosessual və etik aspektləri – hakim baxışı”, Vəkillərin İntizam Komissiyasının sədri Şahmar Məmmədovun “Hakimlər, vəkillər, cinayət təqibini həyata keçirən orqanların əməkdaşları arasında münasibətlərin prosessual və etik aspektləri – vəkil baxışı”, Vəkillər Kollegiyasının Rəyasət Heyətinin üzvü Sima Yaqubovanın “Vəkillərin məhkəmələrdə davranışına dair beynəlxalq standartlar” mövzusunda təqdimatları dinlənilib.

Sonda dəyirmi masa öz işini diskussiya və maraqlı fikir mübadiləsi ilə davam etdirib.

Femida.az