Ombudsman aparatı əməkdaşları ayrı-seçkiliyə qarşı mübarizə mövzusunda təlimlərə qoşulublar


13:25     29 Yanvar 2020 2020/01/15802893244196442897_1000x669_1580290019.jpg

Yanvarın 29-da Qubada Azərbaycan Respublikasının İnsan Hüquqları üzrə Müvəkkili (Ombudsman) Avropa Şurası və Avropa İttifaqının birgə təşkilatçılığı ilə “Şərq tərəfdaşlığı ölkələrində ayrı-seçkilik, nifrət zəminində cinayət qurbanları üçün məhkəmədənkənar mexanizmlər vasitəsilə ədliyyəyə çıxış imkanlarının gücləndirilməsi” mövzusunda maarifləndirici treninq-seminara başlayıb.


Femida.az xəbər verir ki, iki gün davam edəcək təlimlərin əsas məqsədi ayrı-seçkilik əleyhinə Avropa standartları və onların tətbiqi qaydasının təqdim edilməsi, həmçinin Ombudsman aparatı və regional mərkəzlərin əməkdaşlarının aparatın ayrı-seçkiliklə mübarizə mandatının tətbiqində, eləcə də hədəf qrupları və ayrı-ayrı qurbanlarla iş qaydası ilə bağlı bacarıqların artırılmasıdır.

Tədbirdə Azərbaycan Respublikasının İnsan Hüquqları üzrə Müvəkkili Səbinə Əliyeva, Avropa Şurasının Bakıdakı Ofisinin rəhbəri Zoltan Hernyes, Avropa İttifaqının ölkəmizdəki nümayəndəliyinin rəhbəri Kestutis Yankauskas, Aparatın və Ombudsmanın Regional Mərkəzlərinin əməkdaşları, beynəlxalq ekspertlər, vətəndaş cəmiyyəti institutlarının nümayəndələri iştirak edirlər.

Ombudsman Səbinə Əliyeva çıxışında seminarın əhəmiyyətindən danışaraq bildirib ki, Azərbaycan respublikasında insan hüquq və azadlıqları Azərbaycan Respublikasının Konstitusiyası, normativ hüquqi aktlar və ölkəmizin qoşulduğu beynəlxalq müqavilələr kontekstində tənzimlənir. “Əsas qanunumuz olan Konstitusiyanın 25-ci maddəsində qanun və məhkəmə qarşısında hər kəsin bərabər olduğu təsdiq edilib. Bununla da dövlət tərəfindən heç kəsin ayrı-seçkiliyə məruz qalmayacağına dair təminat verilib. Konstitusiyanın 47-ci maddəsi irqi, dini, sosial və hər hansı digər meyara əsaslanan ədavət və düşmənçilik oyadan təşviqata və təbliğata yol verilməsini qadağan etməklə ölkədə insanlar arasında ayrı-seçkiliyə zəmin yarada biləcək fəaliyyətin qarşısını qabaqcadan alır. Azərbaycan Ombudsman institutu, eyni zamanda, ölkədə fəaliyyət göstərən milli insan hüquqları institutu kimi ayrı-seçkiliklə mübarizədə milli, həm də beynəlxalq səviyyədə əhəmiyyətli bir qurum kimi qəbul edilir. Təsisatımız tərəfindən hər il təşkil olunan Ombudsmanların Beynəlxalq Bakı Konfransları fəaliyyətimizdə xüsusi yer tutur. Beynəlxalq ekspertlər və xarici qurumların rəhbər və nümayəndələrinin iştirak etdiyi bu konfransların bir neçəsi məhz ayrı-seçkiliyin qarşısının alınması və hüququ bərabərliyin təmin olunmasına həsr edilib. Ayrı-ayrı vaxtlarda təşkil edilən “Ədalətli sülh və dayanıqlı inkişaf məqsədlərinə nail olunmasında ombudsmanların rolu”, “Hüquq bərabərliyinin təmin olunmasında və təşviqində milli insan hüquqları təsisatlarının rolu” mövzusunda konfranslar da bu qəbildəndir. Avropa İttifaqının dəstəyi və Avropa Şurası ilə birgə keçirilən bu seminarın hamımız üçün faydalı olacağına inanıram”, - deyə Ombudsman Səbinə Əliyeva söyləyib.

Avropa Şurasının Bakıdakı Ofisinin rəhbəri Zoltan Hernyes, həmçinin Avropa İttifaqının ölkəmizdəki nümayəndəliyinin rəhbəri Kestutis Yankauskas çıxışlarında Qubada təşkil olunan seminarın böyük əhəmiyyət kəsb etdiyini diqqətə çatdırıblar.

Kestutis Yankauskas bildirib ki, hamını əhatə edən inklüziv və multikultral cəmiyyətlərin formalaşmasının əhəmiyyəti çox böyükdür. “Bugünkü tədbirdə iki əsas Avropa qurumu iştirak edir. Avropa İttifaqı və Avropa Şurası bu məsələ ilə bağlı komanda şəklində fəaliyyət göstərirlər. Azərbaycan bu təşkilatlardan birinin üzvü, digərinin isə çox vacib tərəfdaşıdır. Avropa İttifaqı olaraq Azərbaycanla münasibətlərdə yeni tərəfdaşlıq qururuq. Belə ki, artıq yeni tərəfdaşlıq sazişi ilə bağlı danışıqları yekunlaşdırırıq. Biz bu il birlikdə yeni “Şərq tərəfdaşlığı”nı formalaşdırırıq ki, Azərbaycan da oranın üzvüdür. Əlbəttə bir sıra qlobal çağırışlar mövcuddur ki, biz buna qarşı müdafiə olunmamışıq. Hamımız üçün bərabərlik şərtlərinin yaradılması çox vacibdir. Hər şeydən əvvəl mövcud olan problemləri gizlətməməli və aradan qaldırmağa çalışmalıyıq. Mən çox sevinirəm ki, bu gün seminarda Ombudsman aparatının regional nümayəndələri də iştirak edir. Bu iki gün ərzində təlim iştirakçılarının imkanı olacaq ki, konkret nümunələr əsasında müzakirə edilən məsələlərlə yaxından tanış olsunlar”, - deyə Kestutis Yankauskas bildirib.

Seminarın birinci günü təşkil olunan sessiyalarda ekspertlər “Ayrı-seçkilik əleyhinə Avropa standartları”, “Ayrı-seçkilik əleyhinə qanunların yerinə yetirilməsinin monitorinqini aparmaq potensialı” mövzularında məruzə ilə çıxış edərək, qabaqcıl təcrübəni paylaşıblar.

Günün sonunda təlim iştirakçılarının Quba Soyqırımı Memorial Kompleksini ziyarət etməsi nəzərdə tutulub.

Seminarın ikinci günündə isə iştirakçılar “Azərbaycan respublikasında ayrı-seçkiliklə mübarizədə hüquqi müdafiə mexanizmlərinə dair təcrübələr haqqında təqdimat” və “Həssas qrupları təmsil edən ayrı-seçkilik qurbanları ilə adekvat iş”, həmçinin “Qiymətləndirmə və sonrakı fəaliyyət; ayrı-seçkilikdə mübarizə məqsədilə tərəfdaşlığın gücləndirilməsi” istiqamətlərində maarifləndiriləcək.

Treninq-seminara Ombudsman ofisinin işçi heyəti, Quba regional mərkəzinin əməkdaşları, yerli icma və azlıqların nümayəndələri olmaqla, ümumilikdə, 30 nəfərə yaxın iştirakçı cəlb olunub.

Femida.az

Açar sözlər: #Ombudsman  

Oxunub: 299