Ombudsman Aparatında hüquqşünaslarla görüş keçirilib
19:47 05 Fevral 2020
Azərbaycan Respublikasının İnsan Hüquqları üzrə Müvəkkili (Ombudsman) Aparatında “Azərbaycan Yeni Nəsil Hüquqşünaslar Assosiasiyası” (AYNHA) ictimai birliyinin “Görüş klubu”nun üzvləri ilə görüş keçirilib.
Ombudsman Aparatından Femida.az-a verilən məlumata görə, tədbirdə Bakı Dövlət Universiteti, Azərbaycan Respublikasının Prezidenti yanında Dövlət İdarəçilik Akademiyası, Naxçıvan Dövlət Universiteti, Kiyev və Xarkov Dövlət Universitetlərinin hüquq fakültəsinin tələbə və məzunları iştirak ediblər.
Aparatın rəhbəri Aydın Səfixanlı görüş iştirakçılarını Ombudsmanın adından salamlayıb və təsisatın fəaliyyəti ilə tanış olmaq təşəbbüslərini yüksək dəyərləndirib. O, daha sonra Azərbaycan Respublikasının Prezidenti İlham Əliyevin gənclərə göstərdiyi xüsusi qayğıdan bəhs edərək, bu günlərdə ölkədə Azərbaycan Gəncləri Gününün qeyd olunduğunu xatırladıb və bildirib ki, ölkəmizdə gənclərin inkişafı və könüllülük fəaliyyətinə xüsusi diqqət yetirilir. O, Prezidentin 2020-ci ilin Azərbaycanda “Könüllülər ili” elan edilməsi ilə əlaqədar Sərəncam imzaladığını və Ombudsman Aparatında cari ildən könüllülərin fəaliyyətə başladığını vurğulayıb.
Gənc hüquqşünasların dövlət müəssisələrində fəaliyyət göstərməsinin əhəmiyyətini qeyd edən Aparat rəhbəri könüllü fəaliyyətin karyera baxımından önəminə diqqət çəkib.
Görüşdə iştirakçılara Ombudsman təsisatının yaranma tarixi, fəaliyyət istiqamətləri, şikayətlərə baxılması qaydaları, qanunvericiliyin təkmilləşdirilməsinə dair təkliflər, Konstitusiya Məhkəməsinə sorğular barədə ətraflı məlumat verilib.
Diqqətə çatdırılıb ki, Müvəkkil tərəfindən irəli sürülən təkliflərin əksəriyyəti artıq nəzərə alınıb. A.Səfixanlı həmçinin İşgəncə əleyhinə Milli Preventiv Mexanizm funksiyası və informasiya əldə etmək sahəsində qanunvericiliyin tələblərinə riayət olunmasına nəzarət funksiyasının Müvəkkilə həvalə edilməsi və bu sahədə görülən işlər haqqında danışıb. Gənc hüquqşünaslar təsisatın vətəndaş cəmiyyəti institutları, beynəlxalq və regional təşkilatlarla əməkdaşlığı, maarifləndirmə sahəsində uğurlu təcrübələri haqqında da məlumatlandırılıb.
Görüşdə iştirakçıların çoxsaylı sualları cavablandırılıb.
Femida.az
Oxunub: 1801
Oxşar xəbərlər
- Ombudsman 31 Mart - Azərbaycanlıların Soyqırımı Günü ilə bağlı bəyanat yayıb
- Ombudsman Rusiyada erməninin azərbaycanlı həkimə xəsarət yetirməsini pisləyib
- Ombudsman erməni terrorçunun Azərbaycan hərbçilərinə qumbara atmasını pisləyib
- Ombudsman İmişlidə 11 yaşlı qızın zorlanmasına münasibət bildirib
- Ombudsman Bolqarıstan rəsmisini Ermənistan cinayətləri ilə bağlı məlumatlandırıb
- Ombudsman Ermənistanın cinayətləri ilə bağlı dünya birliyinə müraciət edib
- Ombudsman Gəncə terrorunun ildönümü ilə bağlı bəyanat yayıb
- Ombudsmanlar azad edilmiş ərazilərlə bağlı bəyanat qəbul edib
- Ombudsmanlar Şuşada səfərdədilər
- Ombudsman Aparatına yeni mətbuat katibi təyin olunub