Məhkəmə prosesi: “Pulu alıb nazirə verdi, indi deyir ki, 80 nəfərə maaş yazılmasından xəbərsizdir”


16:57     10 Mart 2020 20_03_10_1583845117.jpg

Bakı Ağır Cinayətlər Məhkəməsində mənimsəmədə və vəzifə səlahiyyətlərindən sui-istifadə etməkdə təqsirləndirilən Ekologiya və Təbii Sərvətlər Nazirliyinin Hidrometeorologiya Departamentinin direktoru olmuş Əkbər Həsənov, həmin departamentin keçmiş baş mühasibi İlqar Hacıyev, digər əməkdaşları - Orxan Qasımov, Tural Hacızadə və Təbriz Əliyevin cinayət işi üzrə məhkəmə prosesi davam etdirilib.


Femida.az xəbər verir ki, hakim Siyavuş Hacıyevin sədrliyi ilə keçirilən məhkəmə iclasında Əkbər Həsənov sualları cavablandırıb.

Ə.Həsənovdan rəhbəri olduğu departamentin birbaşa kimə tabe olduğu soruşulub. O, nazirə tabe olduqlarını bildirib. Təqsirləndirilən şəxsə mənimsənildiyi iddia olunan 451 min manatın hara xərclənməsi barədə sual verilib. Sabiq departament rəhbəri deyib ki, cari xərclər, internet, telefon - bütün kommunikasiya xərcləri, alpinistlərin axtarışı üçün ayrılan vəsait də qeyd olunan məbləğdən xərclənib.

O həmçinin bildirib ki, departamentdə 80 nəfərin adına kart açılmasından, aylıq maaş ayrılmasından xəbəri olmayıb: "Mənim bildiyim 25-30 kart idi. Onlar üçün də aylıq 6-7 min manat yığılırdı. 80 kartdan xəbərim yoxdur".

Ə.Həsənov digər şəxslərə kart açılmasında İlqar Hacıyevi günahlandırıb. Vəkil Ramil Məmmədzadə Əkbər Həsənovdan sabiq nazir Hüseynqulu Bağırovla arasındakı görüş haqda da soruşub. Təqsirləndirilən şəxs bu fikirlərə münasibət bildirməyib.

Digər təqsirləndirilən - İlqar Hacıyev bu işlərdə sabiq naziri ittiham edib. O bildirib ki, 2018-ci ildə Əkbər Həsənov onlardan 265 min manat pul istənildiyini bildirib. Həmin məbləğin 215 min manatı Salyanda iki zavodun tikintisi üçün alınırdı:

“Əkbər Həsənov bunu mənə deyəndə bildirdim ki, işdən çıxıram. Çünki həmin işi biz bacarmazdıq və çox riskli idi. Hətta Əkbər özü də işdən çıxmaq istəyirdi. Amma iki gün sonra Əkbər Həsənov gəlib dedi ki, Vüqar adlı şəxsdən bu məbləği ala bilər. Buna görə də, Vüqara 10-12 faiz xeyir verilməlidir. Vüqar bizim işlədiyiniz firmalardan birinin rəhbəri idi və münasibətləri yaxşı idi. Əkbər pulu alıb nazirə verdi. Sonra biz xərcləri qaytarmaq üçün kartların sayını artırdıq. Bütün işçilərin də bir siyahısı olub və hamısını Əkbər imzalayıb. Siyahının sonunda ümumi ayrılan məbləğ yazılırdı. Amma indi deyir ki, 80 nəfərin adına maaş yazılmasından xəbərsizdir”.

İ.Hacıyev hər ay kartlardan çıxarılan puldan 10 min manatın nazirə çatdırıldığını da iddia edib: “Ona görə də, bizim işimizdə heç bir problem olmurdu. Yeni nazir gələndə işlər qarışdı. Biz tələsirdik ki, aldığımız borcu qaytaraq. Özümüzə qazanc belə götürmürdük. Yeni nazir dedi ki, heç bir qanunsuz işin görülməsinə icazə verilməyəcək. Audit yoxlamalarından sonra bu məsələlər üzə çıxdı. Əkbərlə Qərb Universitetində Hüseynqulu Bağırovun qəbuluna getsək də, o, bizi qəbul etmədi. Sonra onun mətbuatdakı işlərinə baxan bir nəfərlə görüşdük. Mətbuata müraciət edəcəyimizi bildirdik. Bundan sonra vəkili bizimlə əlaqə saxladı və 300 min manat ödədi. Hüseynqulu Bağırov qalan hissəsini də ödəməli idi. Amma son günə qədər gözləsək də, pulu ödəmədi”.

Proses davam etdiriləcək.

Qeyd edək ki, təqsirləndirilən şəxslər Cinayət Məcəlləsinin 179.3.2-ci (mənimsəmə, külli miqdarda ziyan vurmaqla törədildikdə), 308-ci (vəzifə səlahiyyətlərini aşma) maddələri ilə ittiham olunurlar. İş üzrə nazirliyin Hidrometeorologiya Departamentinin direktoru olmuş Əkbər Həsənov, keçmiş baş mühasib İlqar Hacıyev və departamentin əməkdaşları - Orxan Qasımov, Tural Hacızadə, Təbriz Əliyev təqsirləndirilən şəxs qismində cəlb edilib.

Onlardan yalnız İlqar Hacıyev barəsində həbs qətimkan tədbiri seçilib. Digərləri barəsində polis nəzarəti qətimkan tədbiri seçilib.

Məhkəmədə məlum olub ki, iş üzrə zərərçəkmiş tərəf kimi Ekologiya və Təbii Sərvətlər Nazirliyi ilə yanaşı, 27 nəfər şəxs də var. Onlar əmək müqaviləsi imzalamayan, maaşları karta köçürülərək mənimsənilən şəxslərdir.

İttihama görə, Əkbər Həsənovun rəhbərliyi ilə təqsirləndirilən şəxslər nazirlikdə şəbəkə quraraq külli miqdarda vəsaiti mənimsəyiblər. Belə ki, onlar əmək müqaviləsi bağlanmayan işçilərin əməkhaqlarını kartlara köçürərək, ələ keçirməkdə ittiham olunurlar.

Açar sözlər:

Oxunub: 374