Bağlanan banklarda pulu olanların NƏZƏRİNƏ!
19:10 08 May 2020
Əmanətlərin Sığortalanması Fondunun Himayəçilik Şurasının qərarına əsasən, “Atabank” ASC və “Amrahbank” ASC-də qorunan əmanətlərin kompensasiyaların verilməsi üçün agent bank qismində “Kapitalbank” ASC seçilib.
Fonddan Femida.az-a verilən məlumata görə, “Atabank” ASC və “Amrahbank” ASC-də qorunan əmanətlər üzrə kompensasiyalar nağdsız qaydada “Kapital Bank” ASC-nin adlı debet kartları və “Xəzri” sürətli pul köçürmə sistemi vasitəsilə ödəniləcək.
Əmanətlər “Əmanətlərin tam sığortalanması haqqında” Azərbaycan Respublikasının Qanununa uyğun olaraq kompensasiya olunacaq.
“Kapitalbank” ASC-nin filial şəbəkəsində əmanətçilərin sıxlığının yaranmaması, kompensasiyaların sistemli şəkildə ödənilməsi və vətəndaş məmnunluğunun təmin edilməsi üçün qorunan əmanətlər üzrə kompensasiyalar iki mərhələdə qaytarılacaq. Belə ki, 1 iyun 2020-ci il tarixindən başlayaraq “Atabank” ASC və “Amrahbank” ASC-də 30 min manat ekvivalentinədək (30 min manat daxil olmaqla) olan əmanətlər üzrə kompensasiyaların verilməsi nəzərdə tutulub. 1 iyul 2020-ci il tarixindən başlayaraq 30 min manat ekvivalentindən yuxarı olan əmanətlər üzrə kompensasiyaların verilməsi planlaşdırılır.
“Əmanətlərin sığoratalanması haqqında” Azərbaycan Respublikasının Qanunun 28.3-cü maddəsinə əsasən Əmanətlərin Sığortalanması Fondu əmanətçilərin ərizələrini kompensasiya ödənişi haqqında bildirişin ilk dəfə dərc edildiyi gündən başlayaraq bir il ərzində qəbul edir.
Əmanətlərin qaytarılması prosesi haqqında vətəndaşlara əlavə məlumat veriləcək.
Qeyd edək ki, Azərbaycan Mərkəzi Bankının İdarə Heyətinin 28 aprel 2020-ci il tarixli qərarı ilə “Atabank” ASC və “Amrahbank” ASC-nin bank fəaliyyətinin aparılması üçün verilmiş lisenziyaları ləğv edilib.
“Əmanətlərin sığortalanması haqqında” Azərbaycan Respublikası Qanununa uyğun olaraq “Atabank” ASC və “Amrahbank” ASC-də sığorta hadisəsi günü 28 aprel 2020-ci il müəyyən edilib.
Oxunub: 1130
Oxşar xəbərlər
- Bağlanan 4 bank üzrə əmanətçilərə nə qədər kompensasiya ödənilib?
- Bağlanan banklarda bloklanmış əmanətlərin qaytarılmasına başlanılıb
- Bağlanan bankların müştərilərinə 61 milyon verildi
- Bağlanan 2 bankın əmanətçilərinə 47 milyon manatdan çox kompensasiya ödənilib
- Elman Rüstəmov: Bağlanan banklarda 680 milyon manat qorunan əmanət var
- Bağlanan banklarda əmanəti qalanlara ŞAD XƏBƏR: PULLAR ÖDƏNİLİR (RƏSMİ)
- Bağlanan bankın kreditorlarına müraciət edildi
- Bağlanan bankların əmlakları hərracda satıldı
- Bağlanan 9 bankın əmlakı satışa çıxarıldı - Ev, maşın, torpaq...
- Bağlanan bankların binası satışa çıxarılır