Kamal Cəfərov ermənilərin təxribatı barədə belçikalı deputatları məlumatlandırdı

20:18 23 İyul 2020

"Az öncə Belçikada azərbaycanlı gəncin ermənilər tərəfindən döyülmə səhnəsini izlədim. Eyni zamanda bildirməliyəm ki, dünən aksiya zamanı ermənilər soydaşlarımıza qarşı təxribat törədiblər, REAL TV-nin Avropa bürosunun müxbiri Xatirə Sərdarqızının başına daşla xəsarət yetiriblər".

Femida.az xəbər verir ki, bunu Milli Məclisin Hüquq siyasəti və dövlət quruculuğu komitəsinin üzvü, deputat Kamal Cəfərov deyib.

Onun sözlərinə görə, radikal erməni qüvvələrinin bu vandalizmi nə Azərbaycan, nə də erməni terrorçuluğu ilə üzləşən digər ölkələr üçün əslində yenilik deyil.

"Terrorizm və nifrət cinayəti Ermənistanın dövlət siyasətidir. Erməni radikal ünsürlərinin Azərbaycanlı icmaların üzvlərinə qarşı yönələn nifrətə əsaslanan cinayət əməllərini qətiyyətlə pisləyir və müvafiq ölkələrdə bu kimi təxribatların qarşısının alınmasına məsul olan qurumların vəzifələrinə tam məsuliyyətlə yanaşmalarını gözləyirik. Azərbaycan-Belçika Dostluq Qrupunun rəhbəri kimi Belçika Parlamentindəki həmkarım Tim Vandenput, Belçikanın ölkəmizdəki səfiri Bert Shoofs, ölkəmizim Belçikadakı səfiri Fuad İskəndərov və REAL TV-nin müxbiri Xatirə Sərdarqızı ilə danışdım.

Hadisənin tam təfərrütanı öyrəndikdən sonra bu barədə belçikalı həmkarlarıma geniş məlumat verdim. Vəziyyəti nəzarətlərində saxlamalarını xahiş etdim. Hazırda Belçikanın hüquq-mühafizə orqanları tərəfindən müvafiq araşdırmalar gedir. Axşam saatlarında belçikalı həmkarım deputat Tim Vandenputla yenidən əlaqə saxlayacağıq. Araşdırmaların gedişatı və nəticəsi barədə ictimaiyyət mütəmadi şəkildə məlumatlandırılacaq.

Azərbaycan dövləti hər zaman həmvətənlərinin yanındadır. Soydaşlarımıza bütün müvafiq yardımın göstərilməsi, o cümlədən ehtiyac duyulduğu təqdirdə hüquqi yardımla təmin edilməsinə dair diplomatik nümayəndəliklərimizə müvafiq təlimat verilib", - deyə Kamal Cəfərov vurğulayıb.

Femida.az