Ədliyyə Nazirliyi təlimlərə başladı


18:36     29 Yanvar 2021 2021/01/FED3AC35-46A6-4692-A426-8663B38F53AD_1611931094.png

Azərbaycanın rayonlarənda yerli ərazi icra nümayəndəliklərinin əməkdaşlarına “Elektron notariat” informasiya sisteminə dair təlimlər keçirilir.

Bu barədə Kənd Təsərüffatı Nazirliyindən bildirilib.

Məlumata görə, “Notariat haqqında” qanunun 18-ci maddəsinin 6-cı bəndinə əsasən fermerlərə sahəsi beş hektardan çox təşkil etməyən kənd təsərrüfatı təyinatlı torpaq sahələrinin bir ildən artıq olmayan müddətə icarəyə və istifadəyə verilməsi barədə müqavilələri, habelə xüsusi mülkiyyətdə olan həmin torpaq sahələrinin iki ildən artıq olmayan müddətə icarəyə və istifadəyə verilməsinə dair etibarnamələri müvafiq icra hakimiyyəti orqanlarının vəzifəli şəxsləri təsdiq edirlər. Qeyd edilən torpaq sahələrinin icarə və istifadəyə verilməsi ilə əlaqədar müqavilələrin təsdiq edilməsi “Elektron notariat” informasiya sistemi vasitəsilə həyata keçirilir.

Bu səbəbdən qeyd edilən müqavilələrin təsdiqini həyata keçiriən inzibati ərazi dairələri üzrə icra nümayəndəliklərinin “Elektron notariat” informasiya sisteminə qoşulması prosesi davam etməkdədir. Bununla əlaqədar Kənd Təsərrüfatı Nazirliyinin təşkilatçılığı ilə Ədliyyə Nazirliyi “Elektron notariat” informasiya sisteminə çıxışı olmayan rayonlar üzrə yerli ərazi icra nümayəndəliklərinin həmin sistemə inteqrasiyasının təmin edilməsi məqsədilə təlimlər keçirir. Şəmkir, Qazax, Samux, Goranboy, Ağstafa, Göygöl rayonlarından sonra bu dəfə Salyan, Biləsuvar, Cəlilabad, Neftçala, Ağcabədi, Ağdam, Beyləqan, Göyçay, Ucar, Qax rayonları üzrə icra hakimiyyəti başçısının inzibati ərazi dairələri üzrə nümayəndəliklərinin və aidiyyəti rayon (şəhər) Dövlət Aqrar İnkişaf Mərkəzlərinin əməkdaşlarının iştirakı ilə növbəti təlimlər keçirilib. Təlimlərdə ümumilikdə 221 nəfər iştirak edib. Təlim iştirakçılarına “Elektron notariat” informasiya sistemi barədə ətraflı məlumat verilib, sistemdən istifadə qaydaları əyani formada nümayiş olunub. Sahəsi 5 hektara qədər torpaq sahələrinin icarə əsasında istifadəyə verilən zaman bağlanılan müqavilələrin qanunvericiliyin tələblərinə uyğun aparılması və “Elektron notariat” informasiya sisteminə daxil edilməsinin vacibliyi təlim iştirakçılarına izah edilib.

30 yanvarda Yevlax, Zaqatala, 1 fevralda Zərdab, Balakən, 1-2 fevralda İmişli, 3-4 fevralda Saatlı, 5-6 fevral tarixlərində Tərtər rayonlarında keçiriləcək analoji təlimlərdə 176 nəfərin iştirakı nəzərdə tutulur. Təlimlər qrafik əsasında digər rayonlarda da təşkil olunacaq.

İndiyə qədər 16 rayon üzrə (Ağdaş, Ağsu, Kürdəmir, Qəbələ, Tovuz, Sabirabad, Şəki, Şabran, İsmayıllı, Qusar, Lerik, Bərdə, Masallı, Xaçmaz, Lənkəran, Şamaxı) icra hakimiyyəti başçısının inzibati ərazi dairələri üzrə 581 nümayəndəliyin “Elektron notariat” informasiya sisteminə qoşulması təmin edilib. EKTİS-ə daxil edilən torpaq sahəsi üzərində istifadə hüququna dair sənədlər arasında sahəsi 5 hektara qədər torpaq sahələrinin icarə əsasında istifadəsini nəzərdə tutan müqavilələr çoxluq təşkil edir.

Xatırladaq ki, ölkə prezidentinin 2019-cu il 27 iyun tarixli fərmanı ilə təsdiqlənmiş “Kənd təsərrüfatı məhsulları istehsalının subsidiyalaşdırılması Qaydası”na əsasən 2020-ci ildən aqrar sahədə yeni subsidiya mexanizminin tətbiqinə başlanılıb. Yanvarın 1-dən etibarən subsidiya ilə bağlı müraciətlərin qəbulu Elektron Kənd Təsərrüfatı İnformasiya Sisteminin (EKTİS) altsistemi olan Subsidiya İnformasiya Sistemi (SİS) vasitəsilə həyata keçirilir. Qaydalara görə, fermerlər bitkiçilik sahəsi üzrə subsidiyaları almaq üçün müəyyən olunmuş müddətdə torpaq sahəsindən istifadə hüququna dair sənədləri və əkinləri barədə məlumatları EKTİS-ə daxil etməlidirlər.

Açar sözlər:

Oxunub: 2076