Biləsuvarda Vətən müharibəsi şəhidlərinin xatirə lövhəsinin açılışı olub

15:33     13 Noyabr 2021

Biləsuvar rayonunda Vətən müharibəsi şəhidlərinin xatirə lövhəsinin açılış mərasimi keçirilib.

"Report"un Muğan bürosunun məlumatına görə, Vətən Müharibəsində böyük rəşadət və igidlik göstərərək şəhidlik zirvəsinə ucalan Sahil Məmişlinin, Nicat Qasımzadənin və Elnur Əzizlinin xatirəsi ehtiramla anılıb.

Şəhidlərimizin anım mərasimində iştirak edən Biləsuvar Rayon İcra Hakimiyyətinin rəsmiləri, rayonun hüquq-mühafizə orqanlarının rəhbərləri və ictimaiyyətin nümayəndələri şəhidlərin ata ocaqlarını ziyarət edərək valideynləri ilə görüşüblər. Mərasimdə qəhrəmanlarımızın şərəfli döyüş yolundan danışılaraq xatirələri anılıb.

Daha sonra qəhrəman şəhidlərimizin yaşadıqları evə vurulan xatirə lövhələrinin açılışı olub.

Qeyd edək ki, Vətən Müharibəsi şəhidi Məmişli Sahil Ağaverdi oğlu - 21 avqust 1991-ci ildə Biləsuvar rayonunun Çaylı kəndində anadan olub. Azərbaycan Silahlı Qüvvələrinin giziri Sahil Məmişli 27 sentyabr 2020-ci ildə başlanan Vətən müharibəsində iştirak etmiş, Füzuli, Cəbrayıl, Qubadlı, Zəngilan uğrunda gedən döyüşlərdə qəhrəmancasına vuruşub. 11 noyabr 2020-ci il tarixdə Şuşa şəhəri uğrunda gedən döyüşlərdə şəhid olub. Şəhid Sahil Məmişli 12 noyabr 2020-ci il tarixində doğulduğu Çaylı kəndində dəfn edilib.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Prezidenti İlham Əliyevin Sərəncamları ilə Sahil Məmişli ölümündən sonra "Vətən uğrunda", "Şuşanın azad olunmasına görə" və "Cəsur döyüşçü" medalları ilə təltif edilib.

Açar sözlər:

Oxunub: 487