Nərmin Quliyevanın sinif yoldaşı məhkəmədə ifadə verib
19:20 26 Yanvar 2022
Bu gün Gəncə Ağır Cinayətlər Məhkəməsində Tovuz rayonunda 10 yaşlı Nərmin Quliyevanı qətlə yetirməkdə təqsirləndirilən İlkin Süleymanovun cinayət işi üzrə növbəti məhkəmə prosesi keçirilib.
Femida.az -ın məlumatına görə, hakim Dadaş İmanovun sədrliyi ilə bu gün İlkin Süleymanovun növbəti məhkəmə prosesində Nərmin Quliyevanın sinif yoldaşı və əmisi oğlu olan Ayxan Quliyev ifadə verib. O ifadəsində bildirib ki, sonuncu dəfə Nərmini evlərində görüb.
"Əmim oğlu Qorxmazla bir yerdə idik. Nərmin gödəkcəni götürməyə gəlmişdi. O evdə olanda həyətə çıxdım. Sadəcə çöl qapının səsindən bildim ki, Nərmin çıxıb getdi. Sonra isə onun itkin düşdüyünü eşitdim"- deyə A.Quliyeva bildirib.
Təqsirləndirilən şəxsin müdafiəçiləri məhkəmənin gec başlaması və zamanın az qalması səbəbindən bugünkü məhkəmə prosesinin saxlanılmasını və A.Quliyevanın ifadəsinin növbəti məhkəmə prosesində davam etdirilməsini istəyib.
Hakimin qərarı ilə növbəti məhkəmə fevralın 9-da saat 10:30-a təyin olunub.
Qeyd edək ki, bu gün saat 16-da keçirilməsi nəzərdə tutulan məhkəmə hakim Dadaş İmanovun sədrliyi ilə keçirilən başqa bir məhkəmənin gec yekunlaşması səbəbindən vaxtında başlamayıb.
Xatırladaq ki, Tovuz rayonunun Dondar Quşçu kənd sakini N.Quliyeva 2019-cu il noyabrın 21-də itkin düşüb, onun meyiti 2020-ci il yanvarın 6-da yandırılmış halda tapılıb. 2020-ci il yanvarın 10-da isə hadisəni törətməkdə şübhəli bilinən Dondar Quşçu kənd sakini, 1973-cü il təvəllüdlü İ.Süleymanov saxlanılaraq istintaqa cəlb edilib.
Ona Cinayət Məcəlləsinin 120.2.4 (xüsusi amansızlıqla qəsdən adam öldürmə), 120.2.9 (təqsirkar şəxs üçün aşkar surətdə köməksiz vəziyyətdə olan adamı qəsdən öldürmə), 144.3 (adam oğurluğu) və başqa maddələrində nəzərdə tutulan ittiham elan olunub.
Oxunub: 752
Oxşar xəbərlər
- Nərmin qaçırılan gün onunla birlikdə olan sinif yoldaşı məhkəmədə ifadə verib
- Nərminin işində İlkin Süleymanov DƏHŞƏTLİ FAKTLARI AÇDI: Həmin gecə səhərə qədər...
- Nərmin Quliyevanın əmisi arvadı məhkəmədə ziddiyyətli ifadə verib
- Nərmin Quliyevanın əmisi oğlu məhkəmədə yenidən dindirilib
- Nərminin qətlində təqsirləndirilən İlkin Süleymanovun məhkəməsi təxirə salınıb
- Nərmin Quliyevanın əmisi oğlu məhkəmədə dindirilib
- Nərminin qətli ilə bağlı MƏHKƏMƏ BAŞLADI
- Nərminin qətlində şübhəli bilinən İlkin Süleymanovun həbs müddəti 5 ay uzadılıb
- Nərminin meyitinin o formada ortaya çıxmasında məlum verilişin rolu var - RƏSMİ
- Nərmin Quliyevanı qətlə yetirməkdə şübhəli bilinən şəxs saxlanılıb - RƏSMİ