“Tank maşının üstündən keçdi, ayaqlarım əzildi” - 20 Yanvar şahidi


18:49     20 Yanvar 2016 20%20yanvar1.jpg

1990-cı ildə Bakıda rus tankının əzdiyi maşından sağ çıxan azərbaycanlı 20 Yanvar faciəsinin izlərini gələcək nəsillər üçün saxlayır.



Femida.az-ın məlumatına görə, bu barədə Türkiyənin nüfuzlu saytı olan Anadolu Agentliyi Bakıda törədilən 20 yanvar qətliamı barədə reportaj hazırlayıb. Məlumatda deyilir ki, azərbaycanlılar 1990-ci ildə baş vermiş və tarixə Qanlı Yanvar kimi düşən bu faciənin acısını ürəklərində, Sovet rus əsgərlərinin törətdiyi dəhşətli divanın dəlillərini gözlərinin önündə saxlayır.






Qırğının üzərindən 26 il keçməsinə baxmayaraq, hadisənin acısını yaddaşlarında hələ də yaşadan azərbaycanlılar, o dövrdə baş verənlərin sübutlarını gələcək nəsillərin də görməsi üçün saxlayır.

Ermənilərin torpaqlarını işğal etməsinə qarşı Bakı meydanlarında toplaşanlardan biri olan 57 yaşlı Nazim Ələkbərov olub. Şahid həmin gün yaşadıqlarından danışıb. 20 Yanvar hadisələrinin azərbaycanlıların azadlığa atdığı ilk addım olduğunu vurğulayan Ələkbərov, o tarixdə hamı kimi özünün də xalq hərəkatı üçün çalışdığını, mitinqlərə qatıldığını, mitinq iştirakçılarına yemək, odun kimi materiallar daşıdığını bildirib.





O, 20 Yanvarın ilk saatlarında maşınına odun yükləyərək məhəlləsindəki bəzi gənclərlə mitinq meydanına gedərkən yolda rus tankları ilə qarşılaşıb. Yanlarından keçən tanklardan birinin qəfildən dayandığını və üzərlərinə doğru hərəkət etdiyini dilə gətirən azərbaycanlı, o anları belə xatırlayıb:





"Həm üzərimizə gəlir, həm atəş açırdılar. Qapını açdım uşaqlar tullandı. Tankın tırtılları sanki işıq saçırdı. Tank gəlib maşının üstündən keçdi. Öldüyümü fikirləşdim amma sağ qalmışdım. Sinəm, ciyərlərim, ayaqlarım əzildi, amma həyatda qaldım. Mənim avtomobilimi əzən tank daha sonra yaxınlığımızdan keçən və içində insanların olduğu mikroavtobusu əzdi".

Şahid əzilmiş avtomobildən öz səyi ilə çıxdığını və evə qayıdanda ailəsinə yaşadığı acını danışmağa söz tapmadığını bildirib.

20 Yanvar - 1990-cı il yanvarın 19-dan 20-nə keçən gecə Sovet Ordusunun Azərbaycanda həyata keçirdiyi qətliamdır. Hər il yanvarın 20-si Azərbaycanın müstəqilliyi və ərazi bütövlüyü uğrunda həlak olmuş şəhidlərin xatirəsini yad etmə günü, ümumxalq hüzn günüdür. Bu gün iş günü hesab edilmir. Bu qanun 1992-ci il yanvarın 18-də qəbul olunub.(Anspress)


Açar sözlər:

Oxunub: 7350


Oxşar xəbərlər