Hüquq fakültəsinin sabiq dekan müavini bəraət ala bilmədi – Ali Məhkəmə

16:30     08 Aprel 2015

Ali Məhkəmə Bakı Dövlət Universitetinin Hüquq fakültəsinin sabiq dekan müavini, hüquq elmləri doktoru, professor Məhəmməd İmanlının bəraət istəməsi ilə bağlı iddiasına baxıb.

Femida.az-a məhkəmədən verilən məlumata görə, Ali Məhkəmənin Cinayət kollegiyasının hakimi İmran Hacıqayıbovun sədrliyi ilə keçirilən prosesdə sabiq dekan müavininin iddiası əsassız hesab  edilib. Ali Məhkəmə M. İmanlıya bəraət verməyib.

Xatırladaq ki, Məhəmməd İmanlı Cinayət Məcəlləsinin 311.3.3-cü

(külli miqdarda rüşvət alma) maddəsi ilə ittiham olunub. Lakin məhkəmə onun əməlində Cinayət Məcəlləsinin 178-ci (dələduzluq) maddəsi ilə cinayət tərkibi görüb. O, məhkəmənin hökmü ilə 3 il müddətinə azadlıqdan məhrum edilib.

Məhəmməd İmanlı hökmdən apellyasiya və kasasiya şikayəti versə də, cəzası dəyişdirilməyib. O, cəzasını çəkmək üçün ümumi rejimli cəza çəkmə müəssisəsinə göndərilib. Sabunçu Rayon Məhkəməsinə müraciət edən Məhəmməd İmanlının işinə baxılıb. Məhkəmə onun cəzasının qalan hissəsini məntəqə tipli cəzaçəkmə müəssisəsində çəkməsi barədə qərar qəbul edib.

Qeyd edək ki, BDU hüquq fakültəsi "Cinayət hüququ və kriminalogiya" kafedrasının müəllimi, hüquq elmləri doktoru,

professor əvəzi Məhəmməd İmanlı ikinci ali təhsil almaq üçün ona müraciət etmiş Bakı şəhər sakini Ziyad Süleymanovdan BDU-nun Beynəlxalq iqtisadi əlaqələr fakültəsinə tələbə kimi qəbul edilməsinə görə 40.000 (qırx min) manat pul tələb edərək, 05 may 2012-ci il tarixdə yaşadığı Bakı şəhəri, Zabrat qəsəbəsi,A.S.Puşkin küçəsi 6 №-li evdə qeyd olunan külli miqdarda pulu rüşvət kimi alarkən cinayət başında yaxalanıb.

Femida.az 

Açar sözlər:

Oxunub: 2767