Latviyanın Azərbaycandakı yeni səfiri kim olacaq?
17:21 19 İyun 2015
Latviyanın Azərbaycandakı diplomatik missiyasına Yuris Maklakovs başçılıq edəcək.
Femida.az-ın məlumatına görə bu barədə Trend diplomatik mənbəyə istinadən xəbər verir.
Hazırda Y.Maklakovs Latviyanın Qazaxıstandakı səfiridir. Azərbaycan səfirin diplomatik karyerasında ikinci ölkə olacaq.
Y.Maklakovs 1964-cü ildə anadan olub. Kalininqrad Hərbi Aviasiya Mühəndisliyi peşə məktəbini, 1992-ci ildə Jukovski adına Hərbi-Hava Akademiyasını, həmçinin ABŞ ordusunun hərbi kollecini bitirib.
1993-cü ildən Latviya Milli Müdafiə Akademiyasında dərs deyib, 2001-ci il iyul ayından həmin təhsil ocağının rektoru olub. 2004-cü ildə Hərbi Hava Qüvvələrinin komandanı, 2006-cı il iyul ayında isə Latviya Milli Silahlı Qüvvələrinin komandanı təyin edilib.
Xatırladaq ki, cari ilin aprel ayında Latviyanın Azərbaycandakı səfiri Hardiys Baumanis vəfat edib.
Oxunub: 809
