Səyyar ASAN xidmət Siyəzən, Tovuz və Ələtdə

21:17     05 Dekabr 2016

Səyyar “ASAN xidmət” dekabrın 5-dən 19-dək Siyəzən rayonunda, dekabr 5-dən 24-dək Tovuz rayonunda, dekabrın 5-14-də isə Qaradağ rayonunun Ələt qəsəbəsində vətəndaşlara səyyar formada xidmət göstərəcək.

Bu barədə Femida.az-a Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin İnformasiya təminatı şöbəsindən məlumat verilib.

Bildirilib ki, bundan başqa, Səyyar “ASAN xidmət” avtobusları noyabrın 14-dən Astarada vətəndaşlara xidmət göstərirlər və bu proses dekabrın 13-dək davam edəcək. Noyabrın 7-də Şamaxı və Yevlax olan avtobuslar dekabrın 6-da adəçəkilən rayonlarda qalacaqlar. Noyabrın 25-də Göygölə yollanan Səyyar “ASAN xidmət”in dekabrın 9-dək orada vətəndaşlara xidmət göstərəcək. Noyabrın 29-dan dekabrın 28-dək Qubada, 2-16 dekabr da isə Saatlıda vətəndaşların xidmətində olacaq.
Səyyar şəkildə göstərilən xidmətləri Ədliyyə, Daxili İşlər, Əmək və Əhalinin Sosial Müdafiəsi nazirlikləri və Əmlak Məsələləri Dövlət Komitəsi təqdim edir.

Bu xidmətlərə notariat fəaliyyəti, vətəndaşlıq vəziyyəti aktlarının dövlət qeydiyyatı, şəxsiyyət vəsiqələrinin verilməsi və dəyişdirilməsi, ümumvətəndaş pasportlarının verilməsi və dəyişdirilməsi, sürücülük vəsiqələrinin dəyişdirilməsi, əmək pensiyalarının təyin edilməsi, mənzillər üzərində mülkiyyət hüquqlarının ilkin və təkrar dövlət qeydiyyatına alınması barədə çıxarışların, texniki pasportların verilməsi, daşınmaz əmlakın təsvirinə, dövlət qeydiyyatına alınmış hüquqlara və onların məhdudlaşdırılmasına (yüklülüyünə) dair dövlət reyestrindən arayışların verilməsi, fərdi yaşayış evləri üzərində mülkiyyət hüquqlarının təkrar dövlət qeydiyyatına alınması barədə çıxarışların, texniki pasportların verilməsi daxildir.

Qeyd edək ki, "Səyyar ASAN xidmət"in həyata keçirilməsinin əsas məqsədləri dövlət xidmətlərinin vətəndaşlara daha rahat, yeni və innovativ üsullarla təqdim edilməsi, vətəndaşlar üçün əlçatanlığın təmin edilməsi və vətəndaş məmnunluğuna nail olunmasıdır.

Femida.az

Açar sözlər:

Oxunub: 1122