Manatın məzənnəsi nədən asılı olacaq? - Vüqar Bayrmov

21:51     22 Aprel 2015

"Milli valyutanın son zamanlar dəyişən məzənnəsi göstərir ki, Mərkəzi Bank hələlik özü üçün müəyyənləşdirdiyi dəhliz çərçivəsində dəyişəcək"

Femida.az xəbər verir ki, bunu, iqtisadçı ekspert Vüqar Bayramov "Facebook" sosial şəbəkəsində paylaşdığı statusunda deyib.

İqtisadçı yazıb: "Mərkəzi Bank manatın kursunu dünənki azalmadan sonra bu gün stabil saxlayıb. Ötən həftə möhkəmlənən manat dünən cüzi dəyər itirdi. Bu isə Mərkəzi Bankın milli valyutanı mərhələli möhkəmləndiricəyi ilə bağlı gözləntiləri müəyyən qədər səngitdi. Milli valyutanın son zamanlar dəyişən məzənnəsi göstərir ki, Mərkəzi Bank hələlik özü üçün müəyyənləşdirdiyi dəhliz çərçivəsində dəyişəcək. Bununla da, manatın məzənəsinin necə dəyişəcəyi barədə konkret fikir formalaşmasına əsas yaratmayacaq. Əslində, hal-hazırda manatın məzənnəsinin möhkəmlənməsinə iqtisadi baxımdan əsas olmamaqla yanaşı, onun kursunun kəskin ucuzlaşmasına sosial aspektdən lüzum da yoxdur. Belə görsənir ki, neftin dünya bazar qiymətinə və eləcə də ticarət üzrə əsas tərəfdaş ölkələrdəki milli valyutalardakı məzənnə dəyişikliyinə uyğun olaraq manatın kursu müəyyənləşəcək.

Hələlik isə baş bankda xırda korrektələrlə mövcud məzənnəni qoruyub saxlamağa çalışacaqları gözlənilir. Strateji baxımdan isə, manatın məzənnəsi ölkəyə daxil olan valyuta kütləsindən asılı olacaq. Neftin dünya bazar qiymətinin hər barel üçün 70 dolları örtəcəyi və həmin intervalda stabilləşəcəyi halda manat rahat nəfəs ala biləcək".

Aysel HƏSƏNOVA
Femida.az

Açar sözlər:

Oxunub: 1281