Putin rejissoru cəzalandırdı


01:32     26 Avqust 2015 olegsentsovm.jpg

Rusiyanın Şimali Qafqaz dairəsi üzrə hərbi məhkəməsi "terrorçuluq qrupu yaratmaqda" təqsirkar tanıdığı ukraynalı rejissor Oleq Sentsova 20 il iş kəsib.


BBC-nin rus xidməti xəbər verir ki, ötən həftə iş üzrə yekun nitqlə çıxış edən prokuror Sentsova 23 illik həbs cəzası istəyib. İttiham tərəfi həmçinin solçu fəal Aleksandr Kolçenkonun 12 il müddətinə azadlıqdan məhrum edilməsini tələb edib. Məhkəmə Kolçenkoya 10 il iş kəsib.

Hər iki şəxs Krımın ilhaqından sonra Simferopolda yerləşən rusiyatəmayüllü “Krımın rus icması” və Vahid Rusiya Partiyasının ofislərinə od vurmaqda ittiham edilirlər.

Maydan hərəkatının fəal iştirakçıları olan müttəhimlər prosesin siyasi motivli olduğunu deyirlər. O.Sentsov işgəncə nəticəsində etiraf ifadəsinə məcbur oldunduğunu bildirib.

"Mən sizdən heçnə istəməyəcəm. Hamıya hər şey aydındır. İşğalçıların məhkəməsi mahiyyətinə görə ədalətli ola bilməz" - Oleq Sentsov son sözündə deyib.

Hüquq müdafiəçiləri Oleq Sentsov və Aleksandr Kolçenkonu siyasi məhbus hesab edirlər. Kiyev ölkənin müxtəlif bölgələrində Rusiya hüquq-mühafizə orqanları tərəfindən yaxalanmış Ukrayna vətəndaşlarının azad edilməsini tələb edir.

Andrey Vajda, Kristof Zanussi və Pedro Almodovar da daxil olmaqla bir sıra məşhur rejissorlar Rusiya hakimiyyətinə ünvanlanmış məktubda Sentsovun azad olunmasına səsləyir.

Sentsovu Vladimir Putinə yaxın əlaqələrilə tanınan və Krımın ilhaqını dəstəkləmiş məşhur rusiyalı rejissor Nikita Mixalkov da dəstəkləyib.

Oleq Sentsov Krımın ilhaqından bir neçə həftə keçmiş - 2014-cü ildə həbs olunub. Rejissor 2011-ci ildə çəkdiyi "Gamer" filminə görə tanınıb.

Açar sözlər:

Oxunub: 976