Bakıda məktəbin qarşısında narkotik tərkibli konfet paylanır - İDDİA (VİDEO)

22:04     25 Yanvar 2018

Paytaxtın 23 saylı məktəbin qaşısında uşaqlara narkotik tərkibli həblərin paylanması barədə məlumat yayılıb. “Vatsap”da valideynlərdən birinin yaydığı səs yazısında bildirilir ki, konfet formasında olan bu həblər uşaqlara heç bir səbəb olmadan paylanılır.

Femida.az xəbər verir ki, bu həblərin uşaqlarda narkotik asılılığı yaratması təhlükəsi istisna olunmur. Digər məktəblərin də qarşısında belə təhlükənin olmaması üçün valideynlər bir-birini xəbərdar edir.

Yayılan xəbərlə bağlı Milli Qəhrəman Tahir Həsənov adına 23 saylı orta məktəbin direktoru Yuliya Kərimova açıqlama verib.

Direktor bildirib ki, valideynlər tərəfindən belə bir problemlə bağlı müraciət daxil olmayıb:

“Valideynləri narahat edən məqamlarla bağlı müəllimlərə, direktor müavinlərinə məlumat verirlər. Bu məsələni ilk dəfə sizdən eşidirəm. Bundan başqa, məktəbin 4 tərəfi kamera ilə əhatə edilib. Məktəbin qarşısında uşaqlara nə isə satılması, paylanması mümkün deyil. Çünki kamera ilə yanaşı mühafizəçilər də daim məktəbin ətrafında şagirdlərə nəzarət edir. Belə bir hal müşahidə olunmayıb”.

Məsələ ilə bağlı Təhsil Nazirliyindən bildirilib ki, yayılan informasiyanın heç bir əsası yoxdur.

“Bu yayılan informasiyanın heç bir əsası yoxdur. Heç bir məktəbdə belə hal aşkar olunmayıb”.-deyə, məlumatda qeyd olunub.



Femida.az

Açar sözlər: #Narkotik   #Konfet   Məktəb  

Oxunub: 3049