33 dövlət əmlakı özəlləşdirildi

19:24 13 Fevral 2018

Bu gün Əmlak Məsələləri Dövlət Komitəsi tərəfindən keçirilən növbəti hərracda 33 dövlət əmlakı özəlləşdirilib.

Komitədən Femida.az-a verilən məlumata görə, bunlardan 7 əmlak üzrə vətəndaşlar tərəfindən 17 sifariş qəbul edilib. Sifarişlərdən 4-ü isə elektron qaydada verilib. Qeyri-yaşayış üzrə özəlləşdirilən əmlaklardan 15-i Bakıda qalanları isə Gəncə, Sumqayıt, Bərdə şəhərlərində yerləşir.

Qeyri-yaşayış sahəsi və nəqliyyat vasitəsinə aid olan 2 dövlət əmlakı bir neçə investoru özünə cəlb edə bilib. Nəticədə paytaxtın Nərimanov rayonunda yerləşən əmlakın ilkin start qiyməti 10 min 800 manat olmasına baxmayaraq 30 min 500 manata özəlləşdirilib.

Budəfəki hərracda alıcılardan biri paytaxtın Xətai rayonunda yerləşən qeyri-yaşayış sahəsinin özəlləşdirilməsinə onlayn olaraq qoşulub.

Özəlləşdirilən 33 əmlaklardan 1-i səhmdar cəmiyyət, 3-ü kiçik dövlət müəssisəsi, 18-i qeyri-yaşayış sahəsi, 1-i yarımçıq tikili, 10-u isə nəqliyyat vasitəsidir. Bakı şəhəri üzrə 1 səhmdar cəmiyyəti, 2 kiçik dövlət müəssisəsi, 15 istifadəsiz qeyri-yaşayış sahəsi və 10 nəqliyyat vasitəsi, respublikanın digər şəhər və rayonları üzrə 1 kiçik dövlət müəssisəsi, 3 istifadəsiz qeyri-yaşayış sahəsi və 1 yarımçıq tikili sahəsi özəlləşdirilib.

Özəlləşən kiçik dövlət müəssisələrinin 2-si paytaxtın Sabunçu və Qaradağ rayonlarında digəri isə Abşeron rayonunda yerləşir. Adıçəkilən obyektin ümumi faydalı sahəsi 206 kvadratmetr, torpaq sahəsi isə 250 kvadratmetrə yaxındır. Əmlak torpaq sahəsi ilə birgə özəlləşdirilib.

Səhmdar cəmiyyəti üzrə özəlləşən əmlak “Sabirabad Tədarük” ASC-dir. Yarımçıq tikilisi isə Göyçay rayonunda yerləşən Barama toxumu zavodudur. Adıçəkilən əmlakın torpaq sahəsi 11 min kvadratmetrə yaxındır .

Keçirilən hərracların nəticələri ilə tanış olmaq üçün emdk.gov.az və privatization.az portalının müvafiq bölməsinə daxil olmaq kifayətdir.

Femida.az