Qalmaqallı cinayət işində sözü ekspertiza deyəcək

21:19 26 Aprel 2018

2018/04/leyla-sixliniskaya_1524748922.jpg

Bu gün Bakı Ağır Cinayətlər Məhkəməsində Leyla Şıxlinskayanın klinikasının mənimsəmədə və vəzifə saxtakarlığında təqsirləndirilən sabiq baş mühasibi Şəhla Abbasova və klinikanın əməkdaşları - Səkinə Qasımova, Aytən Hüseynova, Mədinə Hüsiyeva, Yelena Abdullayevanın, Polad Əliyevin cinayət işi üzrə məhkəmə prosesi davam etdirilib.

Femida.az-ın məlumatına görə, hakim Əfqan Hacıyevin sədrliyi ilə keçirilən prosesdə şahid qismində ekspert Zaur Məmmədov ifadə verib. O bildirib ki, təqsirləndirilən şəxslərə qarşı ittihamda göstərilən məbləğ audit yoxlamasına istinadən yazılıb.

Prosesdə iş üzrə təqsirləndirilən şəxslərin müdafiəçiləri tərəfindən yenidən məhkəmə mühasibatlıq ekspertizasının təyin edilməsi ilə bağlı vəsatət qaldırılıb.

Zərərçəkmiş şəxsin vəkili Günay Sultanova məhkəmə-mühasibatlıq ekspertizasının keçirilməsinə zərurət olmadığını qeyd edib.

Məhkəmə verilən vəsatəti təmin edib.

Proses qeyri-müəyyən vaxtadək təxirə salınıb.

Qeyd edək ki, təqsirləndirilən şəxslər klinikanın sahibi Leyla Şıxlinskayanı, o isə keçmiş işçilərini ittiham edir. Klinikanın fəaliyyəti ilə bağlı açılan cinayət işi ilə bağlı məlum olur ki, adı çəkilən şəxslərin əməlləri barədə əvvəlcə Baş prokuror yanında Korrupsiyaya qarşı Mübarizə İdarəsində cinayət işi başlanıb.

Təqsirləndirilən şəxslər Cinayət Məcəlləsinin 179.3.2-ci (mənimsəmə; külli miqdarda törədildikdə) və 313 (vəzifə saxtakarlığı) maddələri ilə ittiham edilirlər.

Leyla Şıxlinskaya mətbuata bu işdə heç bir günahının olmadığını bildirib: “Onlar əvvəl mənim pulumu kəsdilər. Klinikadan mənə pul çatmırdı. 700 min manatdan çox vəsaiti ələ keçiriblər və istintaq da bunu sübuta yetirib”.

Femida.az