Şəhid Yüzbəyovun medalı ailəsinə təqdim olunub - FOTOLAR
21:40 28 May 2018
Düşmən təxribatının qarşısını alarkən şəhid olan Azərbaycan Ordusunun hərbi qulluqçusu Yüzbəyov Əmrah Aydın oğlu “Hərbi xidmətdə fərqlənməyə görə” 3-cü dərəcəli medala layiq görülüb.
Doğulub boya-başa çatdığı Xaçmaz rayonunun Hacıməmmədoba kəndində dəfn olunan şəhidin layiq görüldüyü medal mayın 28-də ailəsinə təqdim edilib.
Müdafiə Nazirliyinin nümayəndələri şəhidin ailə üzvləri ilə birlikdə kənd qəbiristanlığında şəhidin məzarını ziyarət edib, xatirəsini ehtiramla anıblar.
Çıxış edənlər qəhrəmancasına şəhid olmuş Ə.Yüzbəyovun daim xatirələrdə yaşayacağını, onun şərəfli ömür yolunun gənclərə örnək olduğunu bildiriblər.
Ə.Yüzbəyov 1997-ci ildə anadan olub. Orta məktəbi bitirdikdən sonra təhsilini Sumqayıt şəhərində kollecdə davam etdirib. 2015-ci ildə hərbi xidmətə yollanıb. 2016-cı ilin aprel ayında erməni işğalçılarının hücumunun dəf edilməsində və Talış kəndi ətrafındakı yüksəkliklərin düşməndən azad olunmasında iştirak edib. 2016-cı il mayın 3-də erməni silahlı qüvvələrinin təxribatlarının qarşısını alarkən şəhid olub.
Daha sonra şəhidin layiq görüldüyü medal atası Aydın Yüzbəyova təqdim olunub.
Şəhidin atası torpaqlarımızın azadlığı uğrunda canından keçən oğlu ilə fəxr etdiyini söyləyib. Şəhid atası bildirib ki, hər bir Azərbaycan gənci Vətən uğrunda döyüşməyə, torpaqlarımızı düşməndən azad etmək üçün silaha sarılmağa hazır olmalıdır.
Sonra Hacıməmmədoba kəndində şəhidin adının əbədiləşdirildiyi xatirə bulağı ziyarət olunub. (AzərTAc)
Oxunub: 3457
Oxşar xəbərlər
- Şəhid və qazi övladlarına psixoloji dəstəklə bağlı tədbir keçirilib
- Şəhid və şəhid ailəsi üzvləri kimlərdir? - Hüquqi yardım
- Şəhid anaları Ordumuz üçün dua etdi – VİDEO
- Şəhid Pəncəli Teymurovun atası vəfat etdi
- Şəhidin 5 yaşlı övladı faciəvi şəkildə vəfat etdi
- Şəhidlərin xatirəsinin əbədiləşdirilməsi üzrə komissiyanın tərkibində dəyişiklik edilib
- Şəhid qızı məktəb direktoru təyin olunub
- Şəhid hərbi qulluqçumuzla vida mərasimi keçirilir
- Şəhidlərin xatirəsinə həsr olunmuş anım mərasimləri- FOTOLAR+VİDEO
- Şəhid ailələri və müharibə əlillərinə daha 50 mənzil verilib