Trampdan İlham Əliyevə növbəti MƏKTUB

14:54 30 May 2018

ABŞ prezidenti Donald Tramp Azərbaycan prezidenti İlham Əliyevə məktub göndərib.

Femida.az-ın məlumatına görə, məktubda deyilir: "Hörmətli cənab Prezident.

Sizi və Azərbaycan xalqını Beynəlxalq Xəzər Neft və Qaz Sərgisinin 25 illiyi və Cənub Qaz Dəhlizinə ilk qazın verilməsi münasibətilə təbrik edirəm. Azərbaycanla Amerika Birləşmiş Ştatları arasında 30 illik əməkdaşlığın bu mühüm nailiyyətini Sizinlə birlikdə qeyd edirəm.

İlk müstəqil dövlətinin 100 illiyini qeyd edən Azərbaycan indi daha firavan və qlobal iqtisadiyyata bağlı bir ölkədir. Azərbaycanın böyük neft yataqları dünya enerji bazarına sabitlik gətirir. Sizin qaz hasilatınız isə Türkiyə və Avropanın enerji təhlükəsizliyinin təmin edilməsinə töhfə verəcəkdir.

Enerji layihələrinizin uğurunu möhkəmləndirəcək iqtisadi və hüquqi islahatları davam etdirməyinizi dəstəkləyirəm. Böyük dövlətlərimizin və Qafqaz regionunun daha firavan, dinc və təhlükəsiz olması naminə Sizinlə əməkdaşlıq etmək əzmindəyəm".

Qeyd edək ki, Donald Tramp bir neçə gün öncə də Respublika günü və Azərbaycan Demokratik Respublikasının 100 illiyi münasibətilə İlham Əliyevə məktub göndərmişdi.

Femida.az