Afrikada 148 yaşlı Azərbaycan xalçası tapılıb - FOTOLAR
16:47 13 İyun 2018
Daha bir qədim və nadir Azərbaycan xalçası aşkarlanıb.
“Azərxalça” ASC-nin mətbuat xidmətindən Femida.az-a verilən məlumata görə, aşkarlanan qədim və orijinal nümunələrdən biri Naxçıvan MR-in Şahbuz rayonunun Biçənək kəndində 1870-ci ildə toxunmuş xovsuz xalçadır: "Xalça Cənubi Afrika Respublikasının Yohannesburq şəhərindəki bir xalça kolleksiyaçısından alınaraq ölkəmizə gətirilib. Xalçanın Cənubi Afrika Respublikasından əldə edilməsi xalçalarımızın tarixən yayıldığı arealın nə qədər geniş olduğunu göstərir".
Qeyd olunub ki, bu növ xovsuz xalçalara xalq arasında “şəddə”, “sərəndaz” da deyilir. Xalça üzərində əks olunmuş naxışlar, simvollar, türk tayfalarına məxsus damğalar qədim zamanlardan bu torpaqlarda yaşamış insanların dünyagörüşünü, təbiətə münasibətini, həyat tərzini, adət-ənənəsini dəqiq ifadə edir. Əsas bəzək elementi olaraq Naxçıvan qrupu Azərbaycan xalçalarını səciyyələndirən dəvə karvanının seçilməsi də xalçanın orijinal bədii göstəricilərindən biridir. Tədqiqatlar göstərir ki, dəvə, ana-bala dəvə, dəvə karvanı təsvirləri olan xovlu və xovsuz xalçalar, xalça məmulatları Naxçıvan bölgəsində daha çox toxunub. Bu təsvirlər bölgədə yaşayan əhalinin ənənəvi təsərrüfat həyatını əks etdirir.
Xalça əldə əyrilmiş yundan hazırlanan, təbii boyalarla boyanan iplərlə toxunub.
Hazırda bir şəxsi kolleksiyada qorunan, ölçüsü 307 x 172 olan xovsuz xalçanın saxlanma vəziyyəti əladır. İlk baxışdan sənət əsəri təsiri bağışlayan bu qiymətli nümunənin unikallığı həm də odur ki, 140-150 il bundan əvvəl toxunan xovsuz xalçalar nadir hallarda belə salamat qalır.
Femida.az
Oxunub: 2414
Oxşar xəbərlər
- Nazir ermənilərin Şuşadan oğurladıqları xalçaların geri qaytarılması üçün görülən işləri açıqlayıb
- Şuşanın azad olunmasından sonra Qarabağda ilk xalça toxunub
- "Azərxalça"nın sabiq rəhbəri azadlığa buraxılıb
- "Azərxalça"nın sabiq sədrinin 30 milyon manatlıq əmlakına həbs qoyulub
- "Azərxalça”nın sabiq rəhbəri Vidadi Muradovun həbs müddəti uzadılıb
- “Azərxalça”da yeni təyinat olub
- “Azərxalça” istehsalı bərpa edir
- “Azərxalça”ya yeni sədr təyin edildi - SƏRƏNCAM
- Vidadi Muradov “Azərxalça” ASC İdarə Heyətinin sədri vəzifəsindən azad edilib
- “Azərxalça”nın rəhbəri həbs edildi