Məhbusların qaçmasına görə tutulan Penitensiar xidmət əməkdaşlarından yeni xəbər

Məhbusların qaçmasına görə tutulan Penitensiar xidmət əməkdaşlarından yeni xəbər

16:20     18 İyul 2018 1398947325_mehkeme.jpg


Bakıda məhbusların qaçması ilə bağlı tutulan Penitensiar xidmətin üç əməkdaşı - qarovul rəisi Ceyhun Səmədov, qarovul rəisinin müavini Fuad Hacıyev və qarovul rəisinin digər müavini Tural Poladxanovun ittiham aktı ilə tanışlıq mərhələsi başa çatıb.


Femida.az xəbər verir ki, bu barədə "Report"a C.Səmədovun vəkili Vilayət Nadirov məlumat verib.

Onun sözlərinə görə, Bakı İstintaq Təcridxanasında müvəkkili və digərləri cinayət işi ilə tanış olub.

Vəkil bildirib ki, digər təqsirləndirilən şəxslər də ittiham aktı ilə tanış olduqdan sonra cinayət işi yaxın günlərdə məhkəməyə göndəriləcək.

Xatırladaq ki, daha əvvəl məhbusların qaçmasına kömək göstərməkdə təqsirləndirilən müğənni Fədayə Laçın da cinayət işi ilə tanış olub. Onun ittiham aktı ilə tanışlıq mərhələsi başa çatıb.

Qeyd edək ki, ötən il oktyabrın 23-də Bakı-Astara-Bakı planlı dəmir yolu qarovulu ilə xüsusi təyinatlı vaqonda Bakı şəhərinə etap olunan, xüsusilə ağır cinayətlərlə təqsirləndirilməklə həbs edilmiş "Qoca" ləqəbli Etibar Ələkbər oğlu Məmmədov və Əli Rasim oğlu Ağami Biləcəri qəsəbəsi ərazisində müşayiət altından qaçıblar.

Xidməti yoxlamanın ilkin nəticələrinə əsasən, vəzifə borclarını lazımınca yerinə yetirmədiklərinə görə ədliyyə nazirinin əmri ilə Penitensiar xidmətin Konvoy taborunun komandiri, ədliyyə polkovnik-leytenantı Bəhruz Abdullayev və taborun Qərargah rəisi vəzifəsini icra edən, ədliyyə mayoru Hikmət Sadıqov ədliyyə orqanlarından xaric edilib, taborun 2-ci konvoy bölüyünün komandiri, ədliyyə kapitanı Ruslan Zeynalov, 3-cü bölüyün komandiri, ədliyyə kapitanı Rza Xankişiyev və Qərargah rəisinin konvoy xidməti üzrə baş köməkçisi, ədliyyə kapitanı Rakif Məmmədov tutduqları vəzifədən azad olunublar.

Bundan başqa, Bakı-Astara-Bakı qatarında xüsusi təyinatlı vaqonda məhbuslara nəzarət edən qarovul rəisi Ceyhun Səmədov, qarovul rəisinin müavini Fuad Hacıyev və qarovul rəisinin digər müavini Tural Poladxanov saxlanılıb və məhkəmənin qərarı ilə onların barəsində 3 aylıq həbs qətimkan tədbiri seçilib.

Faktla bağlı Baş Prokurorluğun Ağır cinayətlərə dair işlər üzrə istintaq idarəsində Cinayət Məcəlləsinin 304.2.1 (qabaqcadan əlbir olan bir qrup şəxs tərəfindən azadlıqdan məhrum etmə və ya həbs yerindən, yaxud mühafizə altından qaçma) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə cinayət işi başlanmaqla istintaq qrupu yaradılıb, dərhal təxirəsalınmaz istintaq hərəkətləri aparılıb.

Mühafizə altından qaçan Ə.Ağami həbs olunub, E.Məmmədov isə əməliyyat zamanı öldürülüb.

Xatırladaq ki, cinayət işi üzrə müğənni Fədayə Laçın da daxil olmaqla 12 nəfər təqsirli bilinir və 1 nəfər barəsində isə axtarış elan olunub.

Femida.az

Açar sözlər:

Oxunub: 304