Ombudsman Türkiyədən gələn psixoloqlarla görüşüb


21:01     15 Mart 2021 2021/03/16158-1615827496_1615827725.jpg

Azərbaycan Respublikasının insan hüquqları üzrə müvəkkili (ombudsman) Səbinə Əliyeva Türkiyə Respublikasından ölkəmizə dəvət olunmuş bir qrup peşəkar klinik-psixoloq və psixoterapevt mütəxəssislərlə görüş keçirib.

Ombudsman Aparatından Femida.az-a bildirilib ki, həmin mütəxəssislər 44 günlük Vətən müharibəsi və erməni terroru nəticəsində fiziki və mənəvi zərər çəkmiş hərbi qulluqçularımız və onların ailələrinə psixoloji yardım göstərilməsi məqsədilə Azərbaycana səfərə gəliblər.

Görüş zamanı ombudsman Səbinə Əliyeva bu məqsədlə ölkəmizə səfər etdiklərinə və dəvətini qəbul edərək Ombudsman Aparatında görüşdə iştirak etdiklərinə görə Türkiyəli mütəxəssislərə təşəkkürünü bildirib.

Həkim-psixoloqlar dəvətə və göstərilən diqqətə görə ombudsmana minnətdarlıq ediblər. Qeyd olunub ki, Vətən müharibəsi dövründə qardaş ölkənin xalqımıza olan mənəvi dəstəyi Azərbaycanla Türkiyə arasında dostluq və qardaşlıq əlaqələrinin möhkəm olmasının daha bir sübutudur.

Habelə görüşdə iştirak edən qonaqlar Ermənistan silahlı qüvvələri tərəfindən uşaq, qadın və yaşlılar da daxil olmaqla qətlə yetirilmiş azərbaycanlı mülki şəxslər, o cümlədən ziyan dəymiş mülki obyektlər barəsində məlumatlandırılıb.

Femida.az

Açar sözlər:

Oxunub: 449