Maqsud Mahmudovun məhkəməsində zərərçəkmişlər ifadə verib
18:58 30 Mart 2022
Ukraynada tutularaq Azərbaycana gətirilən Maqsud Mahmudovun cinayət işi üzrə məhkəmə iclasında zərərçəkmişlər ifadə verib.
Femida.az-ın xəbərinə görə, Bakı Ağır Cinayətlər Məhkəməsinin hakimi Faiq Qəniyevin sədrliyi ilə keçirilən prosesdə zərərçəkmiş qismində dindirilən Leyla Yusifova bildirib ki, təcili olaraq pul lazım olduğu üçün təqsirləndirilən şəxsə məxsus lombarda qızıllarını girov qoyub:
"Pulu qaytarıb qızıllarımı almaq istəyəndə dedilər ki, Maqsud onları götürüb ölkədən qaçıb. Lombardın qarşısında mənim kimi bir neçə zərərçəkmiş də var idi. Şikayətimdən təxminən 1 ay keçmədi ki Mədinə İsrafilova məni lombarda dəvət edərək qızıllarımı qaytardı. Maqsudla bağlı şikayətim yoxdur".
Digər zərərçəkmiş Rəna Məmmədovanın sözlərinə görə, Lökbatan qəsəbəsində yerləşən lombarda 5 500 manat dəyərində qızıl girov qoyub:
"Anamın vəziyyəti pis idi Gəncəyə getdim. Faiz ödənişləri etməyə gedəndə lombardın bağlı olduğunu gördüm və hamı kimi mən də polisə şikayət etdim. Orda mən Maqsudu görməmişəm. Hamının qızılları qaytarılsa da mənim qızıllarım hələ də qaytarılmayıb".
Daha sonra məhkəmədə elan olunub ki, M.Mahmudovun iş ortağı Mədinə İsrafilova hal şahidi qismində məhkəməyə dəvət ediləcək.
Zərərçəkmiş Firəngiz Dadaşova bildirib ki, M.Mahmudovun lombardının bağlanmasını qardaşından eşidib. Onun sözlərinə görə, girov qoyduğu qızıllarını şikayətindən 10 gün sonra M.İsrafilovadan geri alıb.
Məhkəmənin növbəti iclası aprelin 4-nə təyin edilib.
Qeyd edək ki, Cinayət Məcəlləsinin 178.3.2 (dələduzluq külli miqdarda ziyan vurmaqla törədildikdə) maddəsi ilə Daxili İşlər Nazirliyi tərəfindən beynəlxalq axtarışa verilmiş Mahmudov Maqsud Soltan oğlu 2021-ci ilin iyul ayında Ukrayna ərazisində tutulub.
O, sentyabrın 18-də Ukraynadan Azərbaycana gətirilərək istintaqa təhvil verilib.
İstintaq dövründə onun barəsində xüsusi dəyəri olan əşyaları talama maddəsi ilə ittiham irəli sürülüb.
İş üzrə 90 nəfər zərərçəkmiş var. Zərərçəkmişlərdən ikisi müğənni Afət Fərmanqızı və Vasif Məhərrəmlidir.
Oxunub: 360
Oxşar xəbərlər
- Maqsud Mahmudovun məhkəmə istintaqı başa çatıb
- Maqsud Mahmudovun məhkəməsində zərərçəkmişlər ifadə verib
- Maqsud Mahmudovun əmlaklarının üzərinə həbs qoyulub
- Maqsud Mahmudovun məhkəməsində zərərçəkmişlər dindirilib
- Maqsud Mahmudov müğənnilərdən şantajla pul tələb edib - İTTİHAM AKTI
- Maqsud Mahmudovun məhkəməsi başlayıb
- Maqsud Mahmudovun məhkəməsinin vaxtı məlum olub
- Maqsud Mahmudova əlavə ittiham verilib, istintaq yekunlaşıb
- Maqsud Mahmudov Azərbaycana belə gətirildi (VİDEO)
- Maqsud Məmmədova “Şöhrət” ordeni verildi