Ramin Quluzadə səfiri ermənilərin təxribatları barədə məlumatlandırdı
17:09 13 Oktyabr 2020
Nəqliyyat, Rabitə və Yüksək Texnologiyalar naziri Ramin Quluzadə ilə Özbəkistanın ölkəmizdəki fövqəladə və səlahiyyətli səfiri Bahrom Aşrafxanov arasında görüş keçirilib.
Femida.az-a daxil olan məlumata görə, nazir Bahrom Aşrafxanovu ölkəmizdə diplomatik fəaliyyətə başlaması münasibəti ilə təbrik edib və ona uğurlar arzulayıb. Görüş zamanı Ramin Quluzadə səfirə Ermənistanın ölkəmizə qarşı son hərbi təxribatları və Azərbaycanın öz ərazisində apardığı əks-hücum əməliyyatları barədə məlumat verib.
O bildirib ki, Ermənistan silahlı qüvvələrinin Azərbaycanın Ağdam, Ağcabədi, Tərtər, Goranboy və Bərdə rayonlarına, o cümlədən Gəncə və Mingəçevir şəhərlərinə raket hücumları nəticəsində sentyabrın 27-dən bu günədək 42 nəfər dinc sakin həlak olub, 206 mülki şəxs yaralanıb, 1786 mülki infrastruktura, o cümlədən poçt və rabitə infrastrukturuna ziyan dəyib. Nazir qeyd edib ki, oktyabrın 10-da Moskva şəhərində tərəflər arasında humanitar atəşkəsin əldə olunmasına baxmayaraq, 24 saat keçməmiş, Ermənistanın Vardenis şəhərindən Azərbaycanın ikinci böyük şəhəri Gəncəyə ballistik raket atılıb. Raketin mülki əhalinin sıx yaşadığı yaşayış binasına düşməsi nəticəsində 10 dinc sakin həlak olub, 34 mülki şəxs yaralanıb.
Ramin Quluzadə Özbəkistanın Ermənistan-Azərbaycan Dağlıq Qarabağ münaqişəsinin Azərbaycanın ərazi bütövlüyü və suverenliyi çərçivəsində həlli üçün göstərdiyi dəstəyə görə səfir Bahrom Aşrafxanova təşəkkür edib və qeyd edib ki, beynəlxalq ictimaiyyət Ermənistanı həyata keçirdiyi terror aktlarına görə sərt şəkildə qınamalı və bu fəaliyyətindən çəkinməyə çağırmalıdır.
Görüşdə iki ölkə arasında avtomobil, dəniz və hava nəqliyyatı, tranzit yükdaşımaları və innovasiya sahələrində əməkdaşlığın hazırkı vəziyyəti və inkişaf perspektivlərinə dair fikir mübadiləsi aparılıb.
Femida.az
Oxunub: 731
Oxşar xəbərlər
- Ramin Hacılı məhkəmədə qalmaqal salıb, zaldan çıxarılıb
- Ramin Bayramlı əhalini peyvənd olunmağa çağırıb
- Ramin Hacılı ilə birgə saxlanılanların adları açıqlandı - Siyahı
- Ramin Quluzadə Prezidentin İşlər müdiri təyin edildi
- Ramin Quluzadə səfirlə erməni təxribatlarını müzakirə etdi
- Ramin Quluzadə dünyaca məşhur şirkətin nümayəndələri ilə görüşdü
- Ramin Quluzadə ABŞ nümayəndə heyətini qəbul etdi
- Ramin Qurbanov "Elektron məhkəmə" sistemindən danışdı
- Ramin Hacılı azadlığa buraxıldı
- Ramin Quluzadə BMT rəsmisi ilə görüşüb