“İrevan şehri“ Türkiyədə nəşr edildi
17:18 30 İyul 2015
Azərbaycan Respublikasının Prezidenti İlham Əliyevin göstərişi ilə Azərbaycanın qədim mədəniyyət mərkəzlərindən biri olan İrəvan şəhərinin tarixinin araşdırılması istiqamətində son dövrdə ciddi addımlar atılmaqdadır.
Bu çərçivədə Azərbaycan Respublikasının Prezidenti yanında Strateji Araşdırmalar Mərkəzinin (SAM) təşəbbüsü və dəstəyi ilə Prezident Kitabxanasının şöbə müdiri, AMEA Tarix İnstitutunun elmi işçisi, “İrəvan xanlığı” monoqrafiyasının müəllifərindən olan Nazim Mustafanın “İrevan sehri. Türk-islam varlığı nasıl yok edildi”adlı yeni kitabı bu günlərdə “Berkan Yayınevi” (Ankara) nəşriyyatında çap olunub. SAM-dan SİA-ya verilən xəbərə görə, kitaba AMEA-nın müxbir üzvü, A.A. Bakıxanov adına Tarix İnstitutunun direktoru professor Yaqub Mahmudov ön söz yazıb.
Kitabda Azərbaycanın qədim siyasi və mədəniyyət mərkəzlərindən biri kimi İrəvan şəhərinin tarixi keçmişi, onun etnik tərkibi, memarlıq abidələri və onların aqibəti, sənətkarlıq nümunələri, İrəvan teatrı, ədəbi mühiti, mətbuatı, elm, mədəniyyət və dövlət xadimləri haqqında ətraflı məlumat verilir. Həmçinin bu gün Ermənistan dövlətinin monoetnik paytaxtına çevrilən İrəvan şəhərində XX əsrin əvvəllərindən etibarən azərbaycanlılara qarşı ermənilər tərəfindən həyata keçirilən kütləvi qırğınlar, soyqırımlar və etnik təmizləmə siyasəti haqqında sənədlərin dili ilə söhbət açılır.
Kitabda İrəvan şəhərində mövcud olmuş, lakin zaman-zaman erməni vandalları tərəfindən yer üzündən silinən tarixi-memarlıq abidələrinin bizə gəlib çatan şəkillərindən nümunələr verilmişdir. Əsərin türk dilində çap olunmasının mühüm əhəmiyyəti ondadır ki, Türkiyə ictimaiyyəti və türk tədqiqatçıları İrəvan şəhərinin həqiqi tarixi ilə tanış olmaq imkanı əldə etməklə yanaşı, bu qədim türk-müsəlman şəhərinin hansı yollarla monoetnik erməni şəhərinə çevrildiyini də öyrənə biləcəklər. Nazim Mustafanın bu əsəri həmçinin bu gün Türkiyəyə qarşı ərazi iddiası irəli sürən və uydurma “soyqırım” ittihamı ilə çıxış edən Ermənistan rəsmilərinə və erməni siyasətçilərinə qarşı tutarlı cavab hesab edilə bilər.
Oxunub: 1057
