Kişilər atalıq məzuniyyətinə çıxa bilər - Atalara ŞAD XƏBƏR

15:15     29 Yanvar 2018

Uşağa görə atalıq məzuniyyəti – bu ifadə bizim cəmiyyətdə bəlkə də bir qədər qeyri-adi səslənir. Hətta gülüş doğurur. Az qala kişinin dünyaya uşaq gətirməsi kimi qəbul edilir. Bir sözlə, cəmiyyətdə atalıq məzuniyyəti anlayışı birmənalı qarşılanmır. Bəlkə də bir çoxları bundan xəbərsizdir. Amma Əmək Məcəlləsi haqqında qanunda qadınlar kimi kişilərin də atalıq məzuniyyətinə çıxmaq hüququ var.

Qanunla onlara 14 gün məzuniyyət verilir. O da öz hesabına. Yəni bu müddət ərzində kişilərə heç bir ödəniş nəzərdə tutulmur. Bu səbəbdən də kişilər buna maraq göstərmir və onlara verilən hüquqdan istifadə etmirlər. Nəticədə məsələ kağız üzərində qalıb. Sosioloqlar deyirlər ki, səbəb təkcə maddi maraq deyil, həm də bizim cəmiyyətin buna hazır olmamasıdır.

Əmək müqaviləsi ilə işləyən qadına hamiləliyi dövründə və doğuşdan sonrakı müddətdə 126 gün məzuniyyət verilir. Bu məzuniyyətin 70 günü doğuşdan öncəki, 56 günü sonrakı müddət üçün nəzərdə tutulub. Bu müddət ərzində qadın işlədiyi müəssisədən əmək haqqını tam şəkildə alır.

Sosioloqlar deyirlər ki, bu qayda gender bərabərliyini pozur. Ona görə də qaydalara dəyişiklik edilməli, kişilərin də qadınlar kimi uşağa görə, müavinat alması təmin olunmalıdır. Məsələnin digər tərəfinə gəlincə, sosioloqlar düşünürlər ki, uşaq ailədə təkcə ananın deyil, atanın da qayğısını və tərbiyəsini hiss etməlidir. Yəni balacalar ailələrdə hərtərəfli yetişməlidir.

Əksər xarici ölkələrdə bununla bağlı konkret qayda var. Məsələn, Norveçdə atalıq məzuniyyəti məcburidir və 14 həftəlikdir. Təzə ata-ana olanlar maaşlarının 80 faizini alaraq ümumən 59 həftə doğum icazəsindən istifadə edə bilirlər. Əgər ata bu icazədən istifadə etməsə, hökumət uşaq yardımını azaldır. İsveçdə də kişilər məcburi olaraq iki ay atalıq məzuniyyətinə çıxır. Bu hüquqdan istifadə etməyən atalar uşağa görə onlara verilən məvacibdən azad edilirlər. Almaniyada da valideynlərə verilən ödənişli doğum icazəsi 14 həftədir. Burada dövlət valideynlərə təxminən 1.800 avro maaş ödəyir. Ödənişsiz icazə müddəti isə həm ana, həm də ata üçün uşaq 3 yaşına çatana qədər uzadıla bilir. Fransada 16 həftə olan ödənişli doğum icazəsi, üçüncü uşaqdan sonra 26 həftəyə qədər uzana bilir.

Femida.az

Açar sözlər: #hüquq   #ata   #ana   #uşaq   #doğum   #məzuniyyət   #cəmiyyət  

Oxunub: 6532