BDU-dan tələbələrə müraciət
18:43 13 Avqust 2016
Bakı Dövlət Universitetinə (BDU) 2016-2017-ci tədris ilində qəbul olmuş abituriyentlər müvafiq sənədləri təqdim etməklə qeydiyyatdan keçməlidirlər. Təqdim edilməli olan sənədlərin siyahısı BDU-nun saytında yerləşdirilib.
BDU-dan Femida.az-a bildiriblər ki, sənəd qəbulu zamanı abituriyent öz ərizəsini təsdiq etmək üçün iş nömrəsini və şifrəsini təqdim etməklə mütləq elektron qeydiyyatdan keçməlidir. Elektron qeydiyyat universitetin yeni korpusunun 2-ci mərtəbəsində aparılacaq.
Sənədlər avqustun 15-dən 25-dək universitetin əsas binasının birinci mərtəbəsində qəbul ediləcək.
Ödənişli əsaslarla BDU-ya qəbul olmuş abituriyentlər aşağıdakı hallarda təhsil haqqının ödənilməsindən (müvafiq sənədləri təqdim etməklə) azad olunurlar: məcburi köçkün statusu olanlar, valideynlərini itirmiş və valideyn himayəsindən məhrum olmuş şəxslər, Azərbaycan Respublikasının ərazi bütövlüyünün, müstəqilliyinin və Konstitusiya quruluşunun müdafiəsi zamanı əlil olmuş və Azərbaycan Respublikasının azadlığı, suverenliyi və ərazi bütövlüyü uğrunda həlak olmuş, hərbi əməliyyatlarla əlaqədar itkin düşmüş və məhkəmə tərəfindən ölmüş elan edilmiş vətəndaşların övladları.
Femida.az
Oxunub: 1561
