Süleyman Dəmirəl vəfat etdi

14:07 17 İyun 2015

Türkiyənin 9-cu prezidenti Süleyman Dəmirəl dünyasını dəyişib.

Femida.az xəbər verir ki, 91 yaşlı siyasətçi bu gecə ürək çatışmazlığından vəfat edib.

O, 1924-cü il noyabrın 1-də İsparta vilayəti Atabey rayonunun İslamköy kəndində dünyaya gəlib. 1993 – 2000-ci illər arasında Türkiyənin 9-cu prezidenti olub. 1965 – 1993-cü illər arasında 7 fərqli hökumətin 10 il 5 ay baş naziri olub.

İsmət İnönü və Rəcəb Tayyib Ərdoğandan sonra ən uzun müddət baş nazir olmuş siyasətçidir. 31 yaşında baş direktor, 40 yaşında partiya sədri, 41 yaşında baş nazir olub. Türkiyənin çox partiyalı sistemə keçməsindən sonra ölkədə ən çox hökumət quran siyasətçi ünvanına sahibdir. Fərqli vaxt və partiyalarda 7 dəfə hökumət quraraq 7 dəfə baş nazir olub.

1964-cü ildə "Ədalət" partiyasının rəhbəri, 1965-ci ilin fevral ayında baş nazirin müavini və həmin ilin oktyabr ayında baş nazir vəzifələrində çalışıb.

1975-1980-cı illərdə o, yenidən fasilələrlə koalisiya hökumətinin baş naziri vəzifəsində çalışmağa başlayıb.

1980-cı ildə vətəndaş hərcmərcliyi silahlı çevrilişlə nəticələndiyi zaman (1980-1983) Süleyman Dəmirəl siyasətdən sıxışdırılıb çıxarıldı, 1987-ci ilədək isə siyasətdən tam uzaqlaşdırıldı. 1987-ci ildən o, Doğru Yol Partiyasının rəhbəri seçilib.

1990-1993-cü illərdə Süleyman Dəmirəl yenidən baş nazir təyin olunub, 1993-2000-ci illərdə Türkiyə Cümhuriyyətinin Prezidenti seçilib.

Dəmirəl Türkiyıə siyasətinə bir çox sözləri ilə damğa vurub. Onun Türkiyənin bu günü ilə dsəsləşən ən məşhur deyimi isə " Barışmağı bacarmırsansa, dalaşma. Çünki siyasət uzlaşma nöqtəsidir".