Sarkisyanın qardaşı oğlu 100 min dollara zaminə buraxıldı

18:00     10 Sentyabr 2018

Ermənistanın keçmiş prezidenti Serj Sarkisyanın qardaşı Aleksandrın oğlu Ayk Sarkisyan 50 milyon dram (təqribən 102 min 612 ABŞ dolları) müqabilində həbsdən azad edilərək zaminə buraxılıb.

Femida.az erməni KİV-nə istinadən xəbər verir ki, İrəvanın ümumi yurisdiksiya məhkəməsində Ayk Sarkisyanın şikayəti təmin olunub və ona qarşı həbs-qətimkan tədbirinin zaminə buraxılma ilə dəyişdirilməsi barədə qərar verilib.

Qeyd edək ki, Serj Sarkisyanın qardaşı, biznesmen Aleksandrın oğlu Ayk Sarkisyana qarşı məqsədyönlü şəkildə insan həyatına qəsdə cəhd, qanunsuz silah və hərbi sursat əldə edilməsi və saxlanılması maddələri üzrə cinayət işi açılıb. Məhkəmənin Ayk Sarkisyan barədə həbs-qətimkan tədbirinin seçilməsinə dair qərarı ilə o, Ermənistanı tərk etmək istəyərkən Milli Təhlükəsizlik Xidmətinin əməkdaşları tərəfindən saxlanılmışdı. Aykın doğma qardaşı Narek Sarkisyan da axtarışa verilib. O, narkotik və silah saxlanılmasında, həmçinin qiymətli incəsənət nümunələrinin oğurlanmasında ittiham edilir.

Femida.az

Açar sözlər:

Oxunub: 443