Beşbarmaq dağında qoruq yaradılır - SƏRƏNCAM
16:39 08 İyun 2020
Azərbaycan Respublikası Prezidenti İlham Əliyev “Beşbarmaq dağı” Dövlət Tarix-Mədəniyyət və Təbiət Qoruğunun yaradılması haqqında sərəncam imzalayıb.
Femida.az-ın xəbərinə görə, sərəncamda deyilir ki, Azərbaycanın unikal təbiət abidələrindən olan Siyəzən rayonunun Qalaşıxı kəndi ərazisindəki Beşbarmaq dağının ətrafında dövlət mühafizəsinə götürülmüş bir sıra tarix və mədəniyyət abidələri (son tunc – ilk dəmir dövrünə aid yaşayış yeri, Xızırzində piri, ilk orta əsrlərə aid qala qalıqları, XV-XVII əsrlərə aid karvansara qalıqları) yerləşir.
İlk orta əsrlərə aid Beşbarmaq paralel müdafiə səddi “Xəzər sahil mühafizə konstruksiyaları” daxilində 2001-ci il oktyabrın 24-də UNESCO-nun Təcili Qorunmaya Ehtiyacı olan Maddi-Mədəni İrsin İlkin Siyahısına daxil edilib.
Sərəncam Beşbarmaq dağının Azərbaycan tarixi və mədəni irsi üçün əhəmiyyətini nəzərə alaraq, ətraf ərazilərdə mədəni və təbii irsin qorunması, habelə burada turizmin inkişaf etdirilməsi məqsədilə imzalanıb.
Sənədə əsasən, Siyəzən rayonunun Qalaşıxı kəndində yerləşən Beşbarmaq dağı təbiət abidəsinin ərazisi “Beşbarmaq dağı” Dövlət Tarix-Mədəniyyət və Təbiət Qoruğu elan edilib. Dövlət Turizm Agentliyi “Beşbarmaq dağı” Dövlət Tarix-Mədəniyyət və Təbiət Qoruğunun idarə olunmasını təmin etməlidir.
Nazirlər Kabinetinə tapşırılıb ki, Dövlət Turizm Agentliyi, İqtisadiyyat Nazirliyi, Ekologiya və Təbii Sərvətlər Nazirliyi, Azərbaycan Milli Elmlər Akademiyası və Siyəzən Rayon İcra Hakimiyyəti ilə birlikdə iki ay müddətində “Beşbarmaq dağı” Dövlət Tarix-Mədəniyyət və Təbiət Qoruğunun sərhədini və mühafizə zonasını müəyyənləşdirib təsdiq etsin.
“Beşbarmaq dağı” Dövlət Tarix-Mədəniyyət və Təbiət Qoruğunun fəaliyyəti ilə bağlı tələb olunan zəruri xərclər Azərbaycan Respublikasının 2020-ci il dövlət büdcəsində Azərbaycan Respublikasının Dövlət Turizm Agentliyi üçün nəzərdə tutulmuş vəsait hesabına həyata keçiriləcək.
Femida.az
Oxunub: 981
Oxşar xəbərlər
- Hacıqabulda postda avtomobildən silah-sursat, beşbarmaq götürülüb
- “Beşbarmaq dağı” Dövlət Tarix-Mədəniyyət və Təbiət Qoruğunun hüquq və məqsədləri açıqlanıb
- Biləcəridə 14 yaşlı yeniyetmə beşbarmaqla döyüldü
- Keçmiş məhkumdan "beşbarmaq" götürüldü
- Keçmiş məhkumun avtomobilindən beşbarmaq və tapança götürüldü
- Avtomobilində heroin, metamfetamin və marixuana, cibində isə "beşbarmaq" aşkar edildi
- Bakı sakininin maşınından beşbarmaq götürülüb
- Rusiyadan gələn şəxsdən beşbarmaq və bıçaq götürüldü
- Sumqayıtda keçmiş məhkumdan “beşbarmaq” götürülüb
- “Vinçester”, beşbarmaq, bıçaq götrülüb - DİN-dən generalın qohumu ilə bağlı açıqlama